Real Madrid ka fituar 3-2 ndaj Leganes në “Santiago Bernabeu”, ndeshje e vlefshme për javën e 29-të në La Liga. Një fitore me shumë vuajtje për madrilenët, pavarësisht se ishin ata që kaluan të parët në avantazh.
Pas një topi të bukur të marrë nga Bellingham, Arda Guler pengohet brenda zone, arbitri akordon penallti, minuta e 32-të. Kylian Mbappe e ekzekuton në mënyrë perfekte “panenka-n” dhe kalon Realin në avantazh, por festa e madrilenëve zgjat shumë pak, pasi miqtë barazuan për 1 minutë shifrat.
Pas një kundërsulmi të shpejtë, Leganes barazon shifrat me Diego Garcia. Miqtë nuk u mjaftuan vetëm me barazimin, në minutën e 4o gjetën dhe golin e avantazhit me Dani Raba. Pjesa e parë u mbyll në avantazh 1-2 për Leganes.
Madrilenët e nisin direkt në sulm pjesën e dytë dhe nuk vonoi goli i barazimit. Pas një aksioni të gjatë dhe dy tentativave të dështuara, Bellingham gjendej në kohën dhe vendin e duhur, anglezi dërgon topin në rrjetë duke barazuar shifrat.
Në minutën e 75-të ishte Kylian Mbappe që realizoi golin e tretë dhe të avantazhit pas ekzekutimit mjeshtëror të goditjës së dënimit.Një ndeshje e shkëlqyer për francezin sot. Pas kësaj fitoreje, Reali barazon Barcelonën në krye me 63 pikë, por katalanasit luajnë nesër ndaj Girona-s.
