Izmir Sakica dhe Samuel Troshani për herë të parë do të dalin para Gjykatës së Posaçme të Apelit ku kanë kundërshtuar masën e sigurisë arrest ne burg për sulmin me armë ndaj vëllezërve Prendi në Bushat.
Pasi Gjykata e Shkallës së Parë i la në burg, dy të rinjtë të cilët ndodhen në qeli prej 22 janarit kërkojnë të dalin nga burgu me masa më lehtësuese.
Për sulmin me armë në Bushat në kërkim vijon të jenë Franko Leka dhe Aleksandër Prendi. Ndaj tyre është ngritur akuza e grupit të strukturuar kriminal. Sipas SPAK-ut, Sakica, Troshani dhe Leka bashkë me disa persona të tjerë, ende të paidentifikuar, të armatosur dhe me makina të blinduara janë nisur drejt Bushatit për të vrarë anëtarët e familjes Prendi.
Por sapo grupi i armatosur shkoi në Bushat, Aleksandër Prendi i ka pikasur duke qëlluar mbi makinat e blinduara.
Sipas SPAK-ut, aty ka pasur shkëmbim zjarri pasi janë konstatuar gëzhoja të ndryshme në vendin e ngjarjes.
Ndërkaq, kur kanë kaluar shumë muaj nga ngjarja në fjalë, shkaku i përplasjes vijon të mbetet ende mister.
