Me kërkesë të Drejtorisë së Arsimit, Policia e Kosovës ka kryer sot disa kontrolle pranë institucioneve arsimore pas tri vrasjeve të fundit që kanë goditur Vushtrrinë, raporton KosovaPress.
Kryetari i Vushtrrisë Ferit Idrizi ka bërë të ditur se kanë ndërmarrë masa shtesë për të rritur sigurinë dhe për të garantuar një mjedis të sigurt për nxënësit, të rinjtë dhe të gjithë qytetarët e Vushtrrisë.
Sot janë kryer kontrolle pranë disa shkollave si “Lutfi Musiqi”, “Bahri Haxha” dhe gjimnazi “Eqrem Çabej”, me qëllim të verifikimit të sigurisë dhe për të siguruar që nuk kishte asnjë kërcënim të mundshëm për nxënësit dhe mësimdhënësit dhe gjatë këtyre kontrolleve, nuk është hasur asgjë e dyshimtë.
“Kjo është pjesë e një serie masash që do të vazhdojmë të implementojmë për të garantuar një mjedis të sigurt për të gjithë qytetarët dhe për të luftuar çdo formë të dhunës dhe pasigurisë. Ne do të qëndrojmë të angazhuar për të ofruar mbështetje dhe siguri për komunitetin tonë”, ka shkruar Idrizi.
Tre persona janë vrarë ditëve të fundit në komunën e Vushtrrisë, të cilat kanë tronditur qytetarët e vendit.
