Argjentinë-Brazil ishte padiskutim ndeshje më e luftuar në kualifikueset për Kupën e Botës në Amerikën e Jugut. Në orën 01:00 të mesnatës ekipet zbritën në fushë për të bërë mes tyre llogaritë e fitores.
Duel ky që u fitua me shifrat 4-1 nga Argjentina. Ekipi i Lionel Scalonit merr kështu një triumf shumë të rëndësishëm, ku golat e shënuar nga Alvarez 4’, Fernandez 12’, Alliester 37’ dhe Simeone 71-të i siguruan Argjentinës edhe kualifikimin në Kupën e Botës.
Ndërkohë golin për brazilianët e shënoi Cunha në minutën e 26-të, por Brazili nuk ia doli dot të merrte pikë në shtëpinë e rivalëve.
Kështu Argjentina bëhet Kombëtarja e 4-të që siguron kualifikimin në Kupën e Botës, duke iu bashkuar kështu Japonisë, Zelandës së Re dhe Iranit. Ndërkohë siç dihet Meksika, SHBA dhe Kanadaja janë të kualifikuara si vende organizatore.
Ndërkohë në orët e para të së mërkurës, titujt e medieve kryesore braziliane e kanë theksuar këtë rezultat, duke shprehur fjalë të ashpra kundër ekipit të udhëhequr nga Dorival Júnior, të cilit tani i është vënë në dyshim e ardhmja.
‘O’Globo’ ka zgjedhur si titull: “Vallja argjentinase zbuloi gabimin e evolucionit brazilian”, duke theksuar se rezultati mund të kishte qenë edhe më i rëndë duke marrë parasysh rrethanat e ndeshjes.
‘Globo Esporte’ komentoi: “Brazili shkatërrohet nga Argjentina dhe pëson humbjen më të keqe kundër rivalëve pas 41 vitesh; paraqitja e skuadrës konsiderohet një turp historik”. Një nga titujt më goditës ishte ai i gazetës ‘O Dia’, e cila shpalli: “Turpi historik i Brazilit”.
‘Correio Braziliense’ e përshkroi ndeshjen si një “shfaqje argjentinase”, duke e etiketuar humbjen si një “dështim” që “përçmoi” kombëtaren. Në fund, ‘Lance’ raportoi: “Fitorja historike: Dorival pranon që plani kundër Argjentinës ka dështuar dhe ka ndier presionin”.
