Shtëpia e Bardhë ka nxjerrë të tjera detaje nga bisedimet mes Shteteve të Bashkuara të Amerikës dhe Rusisë.
Sipas mediave të huaja, bëhet e ditur se SHBA dhe Rusia kanë rënë dakord për lundrim të sigurt në Detin e Zi, i cili ka qenë fokusi kryesor i bisedimeve këtë javë.
Po ashtu mësohet se ata gjithashtu kanë rënë dakord për masat që ndalojnë goditjet në infrastrukturën energjetike në Rusi dhe Ukrainë.
Uashingtoni do të ndihmojë gjithashtu për të rivendosur aksesin e Rusisë në tregjet globale për eksportet bujqësore dhe të plehrave.
Me Ukrainën, SHBA tha se ka rënë dakord se do të mbetet e përkushtuar për kthimin e fëmijëve ukrainas të transferuar me forcë.
Kujtojmë se pavarësisht premtimit dhe përpjekjeve të Presidentit Donald Trump për t’i dhënë fundit luftës në Ukrainë në pak ditë, një gjë e tillë ende nuk është arritur.
Ndërkohë edhe Ministri i Mbrojtjes i Ukrainës, Rustem Umerov, thotë se të gjitha palët kanë rënë dakord të “sigurojnë lundrim të sigurt, të eliminojnë përdorimin e forcës dhe të parandalojnë përdorimin e anijeve tregtare për qëllime ushtarake në Detin e Zi”.
Deklarata e plotë e Shtëpisë së Bardhë për Rusinë:
Shtetet e Bashkuara dhe Rusia kanë rënë dakord të sigurojnë lundrim të sigurt, të eliminojnë përdorimin e forcës dhe të parandalojnë përdorimin e anijeve tregtare për qëllime ushtarake në Detin e Zi.
Shtetet e Bashkuara do të ndihmojnë në rivendosjen e aksesit të Rusisë në tregun botëror për eksportet bujqësore dhe të plehrave, uljen e kostove të sigurimit detar dhe rritjen e aksesit në portet dhe sistemet e pagesave për transaksione të tilla.
Shtetet e Bashkuara dhe Rusia ranë dakord të zhvillojnë masa për zbatimin e marrëveshjes së Presidentit Trump dhe Presidentit Putin për ndalimin e sulmeve kundër objekteve energjetike të Rusisë dhe Ukrainës.
Shtetet e Bashkuara dhe Rusia mirëpresin hapjen e zyrave në vendet e treta me synimin për të mbështetur zbatimin e marrëveshjeve energjetike dhe detare.
Shtetet e Bashkuara dhe Rusia do të vazhdojnë të punojnë drejt arritjes së një paqeje të qëndrueshme. Shtetet e Bashkuara përsëritën imperativin e Presidentit Donald J. Trump se vrasja në të dyja anët e konfliktit Rusi-Ukrainë duhet të ndalet, si hapi i nevojshëm drejt arritjes së një zgjidhjeje të qëndrueshme paqeje.
Për këtë qëllim, Shtetet e Bashkuara do të vazhdojnë të lehtësojnë negociatat midis të dyja palëve për të arritur një zgjidhje paqësore, në përputhje me marrëveshjet e bëra në Riad.
Shtetet e Bashkuara i shprehin mirënjohje princit të kurorës Mohammed bin Salman për udhëheqjen dhe mikpritjen e tij në lehtësimin e këtyre diskutimeve të rëndësishme në Mbretërinë e Arabisë Saudite.
