Kupa e Italisë është gati për një revolucion të ri në futboll dhe VAR. “Lega Serie A” ka njoftuar se gjatë gjysmëfinaleve dhe finales së kompeticionit do të fillojë eksperimentimin e transmetimit të sinjalit audio të gjyqtarit në stadiume dhe në televizion, me një kufizim në shpjegimin e vendimeve të marra nga gjyqtari i ndeshjes pas ndërhyrjes së VAR-it për “On Field Review”.
Gjatë kësaj periudhe, telespektatorët dhe publiku në stadium do të mund ta dëgjojnë arsyetimin e vendimit përfundimtar drejtpërdrejt nga gjyqtari i ndeshjes.
Një tjetër implementim i komunikimit do të hyjë në përdorim duke filluar nga java e e 30-të e Serie A me sinjalin “VARDict”, grafikë televizive që do të transmetohet gjatë kontrollit të videos, dhe që do të shfaqen në ekrane të mëdhenj në stadiume, duke informuar spektatorët për rishikimin në monitor ose për një kontroll të zgjatur.
“Lega Serie A” dëshiron të vazhdojë të investojë në inovacion, duke futur të gjitha teknologjitë e reja që mund të favorizojnë spektaklin e kampionatit italian dhe të mbështesë gjyqtarët. “Ne ishim, në fakt, të parët në botë që futëm VAR, SAOT dhe GLT, kemi implementuar ‘VAR Message’ për të përshpejtuar proceset vendimmarrëse dhe tani jemi gati të integrojmë ‘VARDict’ dhe të eksperimentojmë shpërndarjen e sinjalit audio të gjyqtarit brenda stadiumeve dhe në televizion.
Komunikimet në lidhje me mënyrat se si gjyqtarët do t’i marrin vendimet pas OFR synojnë t’i bëjnë masat e marra gjithnjë e më të hapura dhe të kuptueshme për lojtarët, drejtuesit e klubeve dhe të gjithë palët e përfshira, përfshirë publikun në stadium e telespektatorët”, – u shpreh presidenti i “Lega Serie A”, De Siervo.
Nga ana tjetër, presidenti i AIA, Antonio Zappi, shtoi: “Po shkojmë drejt hapjes maksimale të komunikimit, po përpiqemi ta bëjmë procesin vendimmarrës më të kuptueshëm për spektatorët. Për herë të parë në Itali është futur mbështetja me video, Gravina ka kërkuar nga Ifab që ta adoptojë në Serie C dhe në kampionatin e femrave, një rrugë e caktuar dhe hapje që po evoluon”.
