Ish-deputeti i Partisë Demokratike, Myslim Murrizi ka qëndruar për rreth 45 minuta në Prokurorinë e Posaçme.
Në një prononcim për mediat pas daljes nga SPAK, Murrizi u shpreh se është hetuar për 10 muaj rresht nga një grup fëlliqësirash në Policinë e Shtetit, por sipas tij, tashmë ka kryer punë me të edhe SPAK-u edhe prokuroritë e rretheve.
Murrizi deklaroi se informacioni për dosjen për të cilën ka dëshmuar, pritet të bëhet i njohur shumë shpejt.
Murrizi theksoi gjithashtu se kishte shkuar në SPAK me duar në xhepa, pasi nuk kishte nevojë të merrte me vete materiale shtesë që mund t’i nevojiteshin, pasi mbante mend çdo gjë. Ai e cilësoi këtë si një akt të zakonshëm, duke u shprehur se nuk kishte marrë as kartën e identitetit, pasi nuk kishte pasur nevojë për të.
Kujtojmë se Murrizi është kallëzuar më herët nga Policia e Shtetit në Prokurorinë e Tiranës për pastrim parash dhe fsheje të pasurisë, pasi pretendohej se nuk kishte deklaruar 60 mijë euro transaksione me të tretë nëpërmjet kompanisë së tij “Murrizi 2009”.
Prononcimi për mediat:
-Për çfarë u thirrët?
Murrizi: Do ta merrni vesh më vonë. E dini ju çfarë denoncimesh
-Ishit si kallëzues, apo në kuadër të një hetimi?
Murrizi: SPAK ka kryer punë me Myslimi, bashkë me prokuroritë e Shqipërisë. Më kanë hetuar 10 muaj rresh nga një grusht fëlliqësirash të policisë së shtetit. Por kur nuk ka të bëjë me këtë.
-Nga kush prokuror u pritet?
Murrizi: Nuk i njoh këta të të ndërmarrjes së SPAK. Oficeri më shoqëroi te një prokuror që nuk e di… nuk ia mora kartën e ID se nuk as vetë nuk e kisha.
-Kishit ndonjë material shtesë, apo dhatë deklarime?
Murrizi: Unë hyra me duar në xhepa. Materialet shtesë janë këta që hyjnë me dosje. Unë për fatin e keq mbaj mend shumë , nuk kam nevojë për letra.
-Ka të bëjë me qëndrimet tuaja publike, funksionet?
Murrizi: Jo jo! Qëndrimet do të bëjë prapë unë, nuk ka kush më ndalon
-Po për çfarë u thirrët?
Murrizi: Si një nga 3800 mijë votuesit dhe një nga 5 milionë shqiptarë
-Jo të gjithë mund të shkojnë në SPAK.
Murrizi: Edhe çudi të shkojnë të gjithë nuk është. E mbani mend Krajën kur thirri Bektashin me 250 katundarë, ka korrë apo s’ka korrë fshatin me autokombajnë. Një fshat e mbaroi Kraja. Kështu që, avash avash besoj do të vijnë edhe fshatrat e tjerë.
-Për çfarë fshati ishit ju sot?
Murrizi: Pyesni Krajën, kur të dalë.
