Tirana është humbësja më e madhe e Kategorisë Superiore.
Përveç faktit që është e teta në renditje dhe rrezikon të bjerë më poshtë, bardheblutë në fund të sezonit, sido që të shkojnë, do të humbasin mbi 630 milionë lekë të vjetër.
Dhe kjo humbje vjen në dy drejtime: së pari nga mospjesëmarrja në “Final 4” dhe automatikisht duke humbur mundësinë Europë dhe nga ana tjetër, prej tifozërisë.
TIFOZËT – Një nga humbjet më të mëdha të Tiranës këtë sezon janë paratë e biletave. Lojtari i 12-të i bardhebluve nuk ka qenë në stadium, pasi pothuajse të gjitha takimet ekipi bardheblu i ka zhvilluar jashtë Tiranës. Me një llogari të thjeshtë, Tirana ka humbur rreth 300 milionë lekë vetëm nga biletat, pasi nuk ka zhvilluar takimet në “Air Albania”.
EUROPA – Rreth 350 mijë euro të tjera, bardheblutë kanë humbur nga mospjesëmarrja në Europë. Tashmë është pothuajse zyrtare se Tirana nuk del dot në Europë, pasi është 13 pikë nga vendi i katërt dhe jashtë Kupës së Shqipërisë. Kjo do të thotë edhe 330 mijë euro më pak të ardhura për këtë sezon. Me një llogaritje të thjeshtë, bardheblutë janë mangët mbi 630 mijë euro. Kujtojmë që, vetëm për të nisur sezonin, Tirana ka shpenzuar 400 mijë euro.
SHIFRAT – Klubi bardheblu në 2023-in ka arritur një shifër rekord të ardhurash, që gjë i ka sjellë fitim, duke e çuar për vitin e dytë radhazi si një nga skuadrat më të suksesshme në Superiore, madje duke larë jo pak detyrime të së kaluarës. Tirana, në vitin e fundit financiar, ka grumbulluar 235,792,398 lekë, një shumë e madhe, ndoshta nga më të mëdhatë në Superiore.
Në krahasim me një vit më parë, shuma është 60 milionë lekë më shumë të ardhura. Në 2022-in të ardhurat ishin 171,820,036 lekë. Nga shuma e të ardhurave nuk janë specifikuar biletat apo të ardhurat nga shitjet e lojtarëve, por duhet të pranojnë se nga merkatoja dhe Europa, sezoni i shkuar ka qenë nga më të mirët, duke u bërë “guri i themelit” në suksesin financiar të bardhebluve.
SHPENZIMET – Tirana ka bërë shpenzime “big” ose 232,097,333 lekë. Bardheblutë kanë paguar për qira stadiumi 18,244,978 lekë. Në fakt, klubet e Superiores që luajnë jo në stadiumin e tyre e kanë këtë problem. Më pas, shërbim charter 16,665,800 lekë, transferime udhëtim e dieta 8,168,921 lekë. Tirana ka paguar paga dhe shpërblime në 32,840,719 lekë, sigurime shoqërore dhe shëndetësore 5,259,538 lekë. Shpenzime të tjera për lojtarët 115,147,006 lekë. Nuk kanë mbetur pas gjobat dhe dëmshpërblimet 11,880,396 lekë, si dhe shpenzime të tjera rreth 20,000,000 lekë. Siç shihet shumë nga zërat janë shpenzime që mund të kaloheshin, si gjobat dhe dëmshpërblimet që vjet ishin të mëdha, sidomos nga veprimet e tifozëve në Europë dhe gjatë kampionatit.
FITIMI – Në ndryshim nga një vit më parë, fitimi i klubit është 10 herë më pak, por kjo është varur nga shpenzimet e shumta që ka kryer skuadra për lojtarët. Në 2023-in, fitimi ka qenë 3,981,232 lekë, ndërsa në vitin 2022, fitimi ka qenë 44,629,496.54 lekë ose 10-fish më shumë se vitin e fundit. /Panoramasport
