Frika që kishte Atletico Madrid për një dënim të rëndë për Angel Correa ka ndodhur. Sulmuesi ofendoi arbitrin gjatë ndeshjes kundër Getafe të dielën e kaluar.
Argjentinasi është ndëshkuar me katër ndeshje pezullim për ofendimin ndaj gjyqtarit, ndërsa do të humbasë një tjetër ndeshje për shkak të kartonit të kuq që mori për faull ndaj Djene.
Gjyqtari ka mbajtur shënim fjalët e thëna nga Correa pas kartonit të kuq: “Bir k*rve, frikacak”. Menjëherë pas ngjarjes, argjentinasi kërkoi falje për ofendimet e bëra për arbitrin, shokët e tij dhe tifozët, por kjo nuk ndikoi në uljen e dënimit.
Correa do të humbasë jo vetëm ndeshjet në La Liga, por edhe në çdo kompeticion kombëtar. Ai do të mungojë për ndeshjet e kampionatit kundër Barcelonës (16 mars), Espanyol (29 mars), Sevilla (6 prill) dhe Valladolid (13 prill). Po ashtu, Correa do të jetë i pezulluar edhe për ndeshjen e dytë gjysmëfinale të Copa del Rey kundër Barcelonës në “Metropolitano” më 2 prill.
Atletico Madrid ka njoftuar se do të apelojë vendimin në Gjykatën e Apelit, duke shpresuar në uljen e dënimit të lojtarit argjentinas. Mbetet të shihet nëse për Correa do të ketë një ulje dënimi apo vendimi nuk do të ndryshohet më.
