Ndeshja e radhës në kampionat në kuadër të javës së 29-të të kampionatit për Vllazninë do të jetë kundër Tiranës. Kuqeblutë do të luajnë në transfertën “klasiken” përballë kryeqytetasve që në ndeshjen e fundit ndaj Laçit ku fituan me shifrat 4-1 treguan shenja pozitive.
Një duel që përveç historisë dhe rivalitetit që kanë pasur ekipet në vite në kampionatin tonë, luhet edhe për objektivat e këtij edicioni. Përballjet e këtij sezoni mes dy ekipeve më të vjetra në vend tregojnë për një dominancë të Vllaznisë. Kështu ndeshja e fazës së parë e luajtur në Shkodër përfundoi në shifrat 2-2, ku golat për Tiranën i gjenin Jarmouni dhe Ismajli e ndërsa për kuqeblutë shënonte dy herë Balaj.
Në fazën e dytë dueli ishte spektakolar me Vllazninë që triumfonte në shifrat finale 3-4. Dy herë Balaj dhe golat e Malës dhe Grudës do të “vulosnin” suksesin kuqeblu.
Edhe në fazën e tretë ishin sërish kuqeblutë që morën 3 pikët. Ekipi i Brdariç fitonte me përmbysje në shifrat 2-1 ndaj kryeqytetasve, ku golit të Haxhiut, i përgjigjej i zakonshmi Balaj me dopietë.
Statistika që tregojnë për një dominim të Vllaznisë në klasiket e fundit, me shkodranët që do kërkojnë pasurimin e tyre të martën e ardhshme e bardheblutë që do kërkojnë reagimin ndaj rivalit të përjetshëm.
