Superliga shqiptare e futbollit është në raundin e 28-të, ose thënë ndryshe të parën për fazën e katërt. Tirana e Bledi Shkëmbit luan të enjten në orën 16:30 kundër Laçit, duel që zhvillohet në “Niko Dovana” të Durrësit.
Të mbetur pa shtëpi, bardheblutë që janë klubi më i titulluar në vend po kalojnë një sezon zhgënjyes dhe ndodhen në fundin e ftohtë, aq sa po rikthehen makthet e sezonit 2016-17, kohë kur Tirana u rrëzua në Kategorinë e Parë.
Në prag të ndeshjes kundër Laçit, Shkëmbi kërkon tri pikët pasi javët po ikin.
“Jemi në një moment të vështirë, ndoshta është momenti që ne nuk duhet të flasim shumë, por duhet të fitojmë dhe të marrim pike sepse po ikin javë. Kjo situatë nuk është e mirë për të gjithë. Çdo ditë jemi me skuadrën, flasim, duhet të rigjenerojmë anën psikologjike shumë, veç asaj fizike. Duhet të tregojmë që jemi gati, të tregojmë çdo ndeshje se nuk meritojmë të jemi këtu ku jemi.
Disfata në derbin me Dinamon – Pas minutës së 65-të me Dinamon mund të themi se u shkërmoq kjo skuadër. Në ndeshje të tjera nuk mendoj se i takon ajo fjalë. Arrijmë të shënojmë. Për fat të keq shpejt na shënojnë kundërshtarët, duke na barazuar ose duke shkuar në avantazh. Duket se është kthyer në problem psikologjik, çdo javë jemi duke folur dhe duke punuar. Ky është momenti ku duhet të flasim shumë më pak dhe të vrapojmë shumë më shumë.
Mbrojtja – Jemi skuadër që sidomos në fillim të kampionatit nuk kemi pas probleme, përkundrazi shumë të rrezikshëm në sulm. U bënë disa javë që e vuajmë shumë goditjen standarde. Kemi skuadër shtatlartë, por nuk do të thotë vetëm kjo, është dhe përqëndrimi e besimi. Te këto të dyja kemi pasur më shumë probleme.
Rivalët e Laçit – Pikët flasin vetë. Laçi është nga skuadrat më agresive që ka kampionati ynë. Me kuptimin e mirë. Nuk të lejon shumë të luash, është agresive në sulm. Ka ndryshuar shumë nga javët e fillimit, por ne jemi marrë më shumë me veten, për të rregulluar problemet tona.
Kthesa – Më shumë as kundërshtarit nuk po i ruhemi, as aleancave, më shumë po merremi me skuadrën. Bëjnë minuta të mira, bëjnë ndeshje të mira, por nuk arrijnë të fitojnë pikët dhe ndeshjet. Nëse nuk arrijmë të rregullojmë këtë, nuk mund të shikojmë as skuadrat e tjera dhe as aleancat.
Llogaritë – Mua personalisht nuk më pëlqejnë llogaritë. Të gjithë i bëjnë për ndeshjet e radhës, për ne është shumë e rëndësishme që këtë ndeshje të bëjmë mbi maksimumin, për ta fituar.
Frika e rënies në Kategorinë e Parë – Do tregohesha naiv, frikë jo, por vendi ku jemi patjetër të bën ta analizosh dhe kjo nuk diskutohet. Që në momentin që u riktheva te kjo skuadër, kam besim. Në këtë fazë do të bëjmë shumë më mirë”, tha Shkëmbi.
Pas 27 ndeshjeve të luajtura, Tirana me 26 pikë mban pozitën e parafundit (me pikë sa Skënderbeu i fundit), ndërsa Laçi me 31 pikë ndodhet në vendin e gjashtë.
