Një grup tifozësh të Manchester United po përgatit një protestë të re kundër drejtuesve të klubit. Këtë herë, anëtarët e grupit ‘The 1958’ do të shfrytëzojnë ndeshjen e madhe ndaj Arsenalit këtë fundjavë për të shprehur edhe një herë pakënaqësinë e tyre ndaj familjes Glazer.
Organizatorët u bëjnë thirrje tifozëve të “Djajve të Kuq” që të vishen me të zeza, si simbol i “vdekjes së ngadaltë” të klubit, për shkak të borxheve të mëdha, menaxhimit të keq dhe shfrytëzimit të tifozëve, të reflektuar në rritjen e çmimeve të biletave.
Steve Crompton, zëdhënës i grupit, deklaroi:
“Klubi po vdes ngadalë para syve tanë, si brenda ashtu edhe jashtë fushës, dhe i gjithë faji bie mbi modelin aktual të menaxhimit të pronarëve. Në shumë aspekte, kjo është kriza më e madhe që United ka përjetuar që nga katastrofa e Mynihut, e cila frymëzoi edhe emrin tonë.
Klubi po përballet me një ‘Armagedon’ financiar. Borxhet po e çojnë drejt shkatërrimit. Sir Matt Busby duhet të jetë duke u rrotulluar në varrin e tij kur sheh situatën aktuale të një prej institucioneve më të mëdha të futbollit botëror, që tani është në gjunjë dhe në shumë aspekte është bërë objekt talljeje.”
Manchester United renditet në vendin e 14-të me 33 pikë, ndërsa Arsenali është në vendin e 2-të me 54 pikë (13 më pak se Liverpooli, por me një ndeshje më pak). Protesta pritet të jetë një tjetër sinjal i fortë i revoltës së tifozëve ndaj pronarëve amerikanë të klubit.
