Kandidatura e Igli Tares për postin e drejtorit sportiv të Milanit po bëhet gjithnjë e më e fortë. Zërat që e lidhin ish-drejtuesin e Lacios me klubin kuqezi po bëhen gjithnjë e më intensivë dhe të përhapur, duke fituar terren me çdo orë që kalon.
Nuk është hera e parë që emri i Igli Tares lidhet me Milanin. SportMediaset kujton se në vitin 2019, Paolo Maldini e kishte identifikuar pikërisht Taren si njeriun e duhur për t’u bashkuar me të në drejtimin e klubit.
Megjithatë, në atë kohë kishte një pengesë: Tare sapo kishte rinovuar kontratën me Lacion, prandaj vendosi të qëndronte besnik ndaj angazhimit të tij me bardhekaltrit, duke refuzuar ofertën e Milanit. Në vend të tij, kuqezinjtë emëruan Ricky Massara-n, i cili sot është pjesë e Rennes.
Pritet që në javët e ardhshme Milani të marrë një vendim përfundimtar mbi drejtuesin e ri sportiv të klubit.
Gazetari i njohur dhe një njohës i madh i Milanit, Carlo Pellegatti, ka komentuar së fundmi mbi këtë çështje:
“Ka edhe emra të tjerë në garë, si Paratici. Fillimisht, Berta ishte favoriti kryesor, por u afrua shumë vonë dhe tani duket më pranë Anglisë. Tare mund të jetë më përpara në garë, por nuk përjashtohen surprizat.”
