Një gjinekolog francez në pension do të dalë para gjykatësve në Val d’Oise, në veri të Parisit, për t’iu përgjigjur akuzave për përdhunim dhe sulm seksual të më shumë se njëqind pacientëve.
Phuoc-Vinh Tran, 74 vjeç, i ka mohuar akuzat kundër tij gjatë më shumë se 10 viteve hetim për rastin, i cili u zbulua në 2013.
Por ish-mjeku përballet me një gjyq disa mujor, gjatë të cilit do t’i duhet të mbrohet kundër akuzave për kryerjen e 79 përdhunimeve dhe 16 akteve të dhunës seksuale.
Rasti u zbulua në vitin 2013, kur një grua paraqiti një ankesë pas vizitës së saj të parë te Dr. Phuoc-Vinh Tran.
Në zyrën e gjinekologut në Domont, rreth dyzet kilometra në veri të Parisit, pacientja 52-vjeçare vuri re se vizita e mjekut kishte karakteristika të çuditshme, por tha se kishte mbetur si e “paralizuar”.
Të gjithë pacientët e tjerë u kontaktuan nga hetuesit dhe më pas mbi njëqind gra paraqitën një ankesë, secila me karakteristika të ngjashme.
Ish-mjeku që në fillim i ka kundërshtuar akuzat, duke sulmuar “reputacionin” e tij. I lindur në Vietnam, Dr. Tran studioi mjekësi në Francë. Ai përsëriti para gjykatësve se lëvizjet e tij janë “keqinterpretuar” nga pacientët që kanë “njohuri të dobët të gjesteve mjekësore gjinekologjike”.
