Kanadaja do të vendosë tarifa prej 25% ndaj importeve amerikane me vlerë 155 miliardë dollarë, siç njoftoi kryeministri Justin Trudeau në një konferencë për media të martën.
Ai theksoi nga Otava se nuk ka asnjë justifikim për tarifat që SHBA ka vendosur ndaj Kanadasë, të cilat janë zbatuar që nga dita e martë. Sipas Trudeau-t, SHBA po përpiqet të qetësojë Putinin, ndërkohë që ka shpallur një luftë tregtare ndaj Kanadasë, një aleati të ngushtë.
Trudeau theksoi se SHBA ka nisur një luftë tregtare ndaj Kanadasë, ndërsa po përpiqet të punojë me Rusinë dhe të qetësojë Vladimir Putinin, një udhëheqës që ai e quajti “diktator dhe vrasës”.
Ai bëri të ditur se mallrat amerikane me vlerë 30 miliardë dollarë do të kenë tarifa menjëherë, ndërsa mallrat e tjera, që arrijnë në 125 miliardë dollarë, do të taksohen brenda 21 ditësh.
Trudeau shtoi se Kanadaja do të vazhdojë të mbrojë interesat e saj dhe do të paraqesë kërkesa në Organizatën Botërore të Tregtisë, por tarifat e Kanadasë do të mbeten të zbatueshme derisa SHBA të tërheqë masat e saj.
Ai theksoi se Kanadaja do të reagojë me qetësi dhe arsyeshmëri, por nuk do të tërhiqet nga kjo përballje tregtare.
