Javën e ardhshme pritet që Sekretari i Përgjithshëm i NATO-s, Mark Rutte, të qëndrojë për një vizitë në Kosovë. Ndonëse ende e pakonfirmuar zyrtarisht, data kur besohet se Rutte do të jetë në Prishtinë është11 mars.
Vizita e shefit të NATO-s shihet si përkushtim i Aleancës për situatën e sigurisë në Ballkanin Perëndimor.
“Është shumë e rëndësishme dhe bartë mesazhin se NATO-ja, konkretisht Perëndimi janë shumë të interesuar për paqe dhe stabilitet dhe ruajtjen e rendit dhe sigurisë në këtë pjesë të Ballkanit të Perëndimor”, deklaroi Valdet Hoxha, ish-zv/ministër i Brendshëm.
Vizita e Rutte në Kosovë vjen në një kohë kur dinamikat politike dhe aleancat janë në një pikë kritike dhe mes diskutimeve për tërheqjen e trupave amerikane nga Europa.
“NATO-janë krye me Rutte dhe kryesisht vendet perëndimore janë të gatshëm që të marrin mbi supet e tyre çështjen e sigurisë së rajonit dhe të Europës kryesisht pavarësisht dinamikës dhe raporteve së fundmi të tensionuara mes BE dhe SHBA”, u shpreh Hoxha.
Një ditë para Rutte, më 10 mars, në Kosovë raportohet se do të qëndrojë edhe emisari amerikan për misione të posaçme, Richard Grenell. Grenell mbetet kritiku më i madh i Qeverisë së Kosovës dhe kryeministrit Albin Kurti.
“Çështjet janë të tensionuara në kontekstin gjeopolitik dhe padyshim Republika e Kosovës do të duhet të reflektojë, do të duhet të krijojë ura dhe bashkëpunim e komunikim dhe asesi të mos gjendemi në ndonjë situatë të pa lakmueshme siç është rasti tanimë eklatant diplomatik në mes Ukrainës dhe SHBA”, tha Drizan Shala, ekspert i sigurisë.
Ballkani Perëndimor, sidomos Kosova, mund të ketë presione për të përmbyllur sa më shpejtë çështjen e dialogut.
“Sipas të gjitha gjasave do të arrihet marrëveshja përfundimtare mes Kosovës dhe Serbisë dhe njëkohësisht do të përcaktohet rruga euroatlantike e rajonit të Ballkanit Perëndimor”, theksoi Shala.
Së fundmi, Kosova është qortuar për mbylljen e katër qendrave për punë sociale që operonin në katër komunat me shumicë serbe në veri dhe mbyllja e vazhdueshme e strukturave paralele ka bërë që ndërkombëtarët t’i kërkojnë Kosovës të mos ndërmarr veprime të njëanshme
