Fshati Zhamë, në anë të hekurudhës dhe autostradës Lushnje-Rrogozhinë ka mbetur më shumë se 30 vite pas në kohë. Banorët e këtij fshati prej shumë vitesh nuk njohin asnjë investim në infrastrukturën rrugore, energji elektrike dhe ujë të pijshëm.
I gjithë fshati aktualisht është nën pushtetin e baltës dhe banorët janë kujdesur vetë herë pas here të shtrojnë sadopak rrugët. Automjetet nuk shkojnë dot në rrugën e varrezave për shkak të amortizimit të tejskajshëm, teksa e njëjta situatë paraqitet edhe në rrugën deri në fund të fshatit.
Elektroshtëpiaket nuk punojnë për shkak të tensionit të ulët, gjithashtu mungon edhe uji i pijshëm. Banorët shprehen se prej më shumë se 30 vitesh u mungojnë tre elementë bazë për jetën e tyre: rruga, energjia dhe uji.
Fatmiri, është vetëm 19 vjeç dhe nuk e sheh dot të ardhmen e tij në Zhamë, ku familja ka investuar gjithçka. Mungesa e perspektivës për të ardhmen në vendlindje e ka bërë të mendojë emigrimin.
Nga rreth 700 banorë që ka pasur ky fshat, aktualisht sot jetojnë më pak se gjysma./syritv
