Javier Tebas ka folur sërish në një ngjarje të organizuar nga “Europa Press”, duke u përqendruar në temat që e shqetësojnë, përfshirë Real Madridin, “Negreira”, Dani Olmo, Barcelona dhe Superligën.
Kreu i La Liga-s theksoi se pirateria është një problem i madh, veçanërisht në Spanjë, ku 30% e futbollit ndiqet me tarifë të ulur ose falas, teksa në Amerikën Latine kjo shifër arrin në 60%: “Pirateria televizive e ndeshjeve është një problem i rëndësishëm, ky është shqetësimi ynë kryesor”.
Në lidhje me UEFA-n dhe FIFA-n, Tebas u shpreh kritik, duke thënë: “Kupa e Botës për Klube detyron ndryshimin e kalendarit. Formati i ri i Ligës së Kampionëve zë më shumë javë, me sezonin që përfshin edhe Kupën e Botës për Klube, situata bëhet më e ndërlikuar. Ata i kanibalizuan të drejtat dhe këtë do ta shohim në eventet e ardhshme.
Kur konkurrenca kombëtare humb vlerën, kompeticionet europiane fitojnë më shumë. Është thelbësore që çdo vendim të merret në bashkëpunim me ligat, klubet dhe sindikatat. FIFA dhe UEFA duhet të respektojnë disa rregulla që tani nuk po i zbatojnë”.
Për Superligën, ai tha: “Nuk ka gjysmë masa: ose je për të, ose kundër. Nuk kam për të negociuar me Florentino Pérez. Te Real Madridi po përpiqen të përhapin një teori konspirative që nuk ekziston”.
Tebas gjithashtu komentoi për një La Liga pa Real Madridin dhe Barcelonën, duke thënë: “Është e pamundur. Është si Madridi pa ‘Puerta de Alcalá’. Modeli europian i sportit bazohet te ligat kombëtare, as Europa dhe as të tjerët nuk do ta lejojnë.”
Në lidhje me formatin e ri të Ligës së Kampionëve, ai shtoi: “Duhet të shohim se çfarë ndikimi ekonomik do të ketë. Krijimi i Kupës Botërore për Klube, e miratuar nga UEFA, dhe zgjatja e Ligës së Kampionëve deri në vitin 2034 janë probleme që nuk mund t’i injorojmë. Shumë kampionate kombëtare do të preken. Nëse paratë zvogëlohen për futbollin spanjoll, nuk mund të jetë vetëm faji im”.
Në lidhje me Barcelonën, presidenti i La Liga-s shprehu shqetësim për situatën e saj financiare dhe periudhën e vështirë që po kalon pas pandemisë. Për Dani Olmo, ai tha: “Barcelona kishte katër muaj që nga gushti për të gjetur zgjidhje. Ata kishin kohë, por donin ta zgjidhnin gjithçka shpejt. Më 3 janar, pasi dhanë garancitë e kërkuara, gjetën fondet dhe e zgjidhën çështjen. Olmo nënshkroi duke qenë i vetëdijshëm se mund të mos regjistrohej në dhjetor”.
Në fund komentoi edhe për çështjen “Negreira”, duke thënë: “Korrupsioni sportiv është një krim dhe nuk ka afat për ndjekjen e tij. Ne besojmë se ka pasur një përpjekje për të ndikuar në promovimet dhe rëniet e gjyqtarëve. Po të kishim mundur të vendosnim sanksione, do ta kishim bërë. Nëse nuk do të kishte kaluar afati, Barcelona do të kishte rënë nga kategoria”.
