Presidenti i Ukrainës, Volodymyr Zelensky, ka deklaruar se do të ishte i gatshëm të jepte dorëheqjen nga posti i tij nëse vendi i tij do të anëtarësohej në NATO, apo në këmbim të paqes.
“Po, do ta bëja, nëse është për paqen e Ukrainës. Nëse është e nevojshme që unë të largohem nga kjo karrige, jam gati ta bëj këtë, dhe gjithashtu mund ta këmbej edhe me anëtarësimin e Ukrainës në NATO” – deklaroi Zelensky.
Gjatë një konference për shtyp në Kiev, Zelensky theksoi se dëshiron të shohë presidentin e SHBA-së, Donald Trump, si një partner të Ukrainës dhe jo thjesht si një ndërmjetës mes Kievit dhe Moskës.
“Dua vërtet që ai të jetë më shumë sesa një ndërmjetës i thjeshtë, nuk është e mjaftueshme” u shpreh Zelensky.
Presidenti ukrainas u shpreh gjithashtu “mirënjohës” për mbështetjen e administratave të Biden dhe Trump, por shtoi se pret “mirëkuptim” nga presidenti aktual amerikan, si dhe garanci sigurie për Ukrainën. Ai konfirmoi se e ka ftuar Trumpin të vizitojë Ukrainën, por deri më tani kjo nuk ka ndodhur.
“Ndoshta ai do të vijë, ose ndoshta unë do të shkoj në Washington, dhe kjo do të ishte shumë e dobishme,” shtoi Zelensky.
Sa i përket mbështetjes ushtarake, presidenti ukrainas tha se ende nuk janë dorëzuar paketat e armëve nga Shtetet e Bashkuara, të cilat arrijnë një vlerë prej rreth 15 miliardë dollarësh.
Në lidhje me ndihmën ekonomike amerikane, Zelensky refuzoi pretendimet se Ukraina i detyrohet SHBA-së 500 miliardë dollarë për ndihmën e marrë gjatë luftës, një shifër që shpesh është përmendur nga Donald Trump. Ai argumentoi se grantet nuk duhet të trajtohen si kredi dhe se ndihma e dhënë nuk duhet të ketë kthim financiar.
