Një konflikt ka ndodhur pasditen e së premtes në Sarandë, ku si pasojë ka mbetur i plagosur një 52-vjeçar.
Sipas policisë, në pranga është vënë një nga autorët e dyshuar, shtetasi D. M., 37 vjeç, me precedent kriminal në krimet ndaj personit, ndërsa vijon kërkimi për kapjen e shtetasit M. M., 29 vjeç.
37-vjeçari, policia thotë se fshihej në një banesë në fshatin Lukovë, aty ku edhe u lokalizua nga efektivët e policisë.
Dy autorët, xhaxha dhe nip, dyshohen se më datë 21.02.2025, rreth orës 16:10, në vendin e quajtur “Rruga për në Heremec”, në lagjen nr. 3, Sarandë, për motive të dobëta, kanë goditur me grushte, shkelma dhe sende të forta shtetasin S. Ç., 52 vjeç, duke i shkaktuar dëmtime të rënda.
Shërbimet e Policisë po vijojnë punën për kapjen e 29-vjeçarit të shpallur në kërkim si bashkëautor.
Materialet u referuan Prokurorisë për veprën penale “Plagosje e rëndë me dashje” e kryer në bashkëpunim.
