Në një intervistë për “Gazzetta dello Sport”, ish-trajneri i Milanit dhe kombëtares italiane, Arrigo Sacchi, shprehu kundërshtimin e tij ndaj heqjes së kohës shtesë në ndeshjet me eliminim direkt në Champions League, një ide kjo që po merret në konsiderim nga UEFA.
“Nëse synimi i futbollit është të argëtojë njerëzit, atëherë duhet të luhet më pak dhe të stërviten më shumë. Kështu, publiku do të mund të ndjekë ndeshje të bukura, të luajtura nga sportistë në formë të përsosur. Jam plotësisht kundër heqjes së kohës shtesë.
Eliminimi i 30 minutave të adrenalinës së pastër nuk do të ishte në të mirë të këtij sporti. Për më tepër, skuadrat më të dobëta do të mbroheshin për 90 minuta, duke shpresuar te penalltitë për të fituar”.
Më tej, Sacchi kritikoi sistemin e penalltive si metodë për të përcaktuar fituesin: “Penalltitë janë më të drejta sesa shorti me monedhë, siç ndodhte dikur, por nuk janë mënyra më e mirë për të përcaktuar kush ishte më i fortë.
Dhe këtë nuk e them vetëm sepse humba një finale të Kupës së Botës më 1994 ndaj Brazilit. Pas 120 minutash lodhjeje, është shumë e vështirë edhe për lojtarin më të mirë në botë të shënojë nga pika e bardhë. Prandaj, besoj se zgjidhja më e drejtë do të ishte përsëritja e ndeshjes”.
