Bayern Munich duhej të vuante për të eliminuar Celtic (1-1) dhe për të kaluar në raundin e 1/8-ave të Champions League.
Një gol i Alphonso Davies në minutën e 94-të, me vetëm 40 sekonda të mbetura në fundin e ndeshjes, i shpëtoi bavarezët nga koha shtesë në Allianz Arena.
Ajo që ndodhi më pas, me Vincent Kompany që zëvendësoi Jamal Musiala me Thomas Muller në minutën e 95-të për të fituar kohë ka zemëruar legjendën e Bayernit, Lothar Matthaus.
Ish-mesfushori tha për Sky Sports DE: “Ishte poshtëruese. Më trishtoi dhe më vjen keq për të. Më befasoi: Thomas Müller nuk duhet të kalojë situata të tilla.
“Ai është një nga lojtarët më të mirë dhe më të suksesshëm të të gjitha kohërave. Për të luajtur vetëm pak sekonda, trajneri mund të kishte zëvendësuar një lojtar tjetër”.
Matthaus u përpoq të vihej në vendin e Muller-it: “Ç’kuptim ka ta fusësh disa sekonda nga fundi? Për t’i dhënë një paraqitje tjetër në Champions League? Do të isha ndjerë keq po të isha ai.
“Nëse kjo është perspektiva për të ardhmen, atëherë ai duhet të bëjë diçka tjetër. Unë nuk mendoj se atij i pëlqeu”, përfundoi Matthaus.
Një lëvizje e trajnerit Kompany që ngjall dyshime të mëtejshme për të ardhmen e Muller-it, i cili në moshën 35-vjeçare e gjen veten me një kontratë që skadon në qershor… dhe në Gjermani nuk e përjashtojnë që ai të mund të “varë këpucët” pas 737 ndeshjeve, 247 golave, 272 asisteve dhe 32 titujve.
