Një projekt-ligj francez që ndalon shaminë në sport, mori reagime të mërkurën nga Studentët Muslimanë të Francës (EMF).
EMF, një organizatë studentore mbarëkombëtare, e përshkroi projektligjin si “racist, islamofobik dhe seksist”, duke argumentuar në një deklaratë në X, se ai minon parimet e barazisë.
Këtë javë, Senati francez do të debatojë dhe votojë një projekt-ligj, që synon të zgjasë ndalimin e simboleve fetare – përfshirë shamitë – në të gjitha garat sportive në Francë.
Organizata theksoi se është urgjente të kundërshtohet “politika e kontrollit dhe sanksioneve”, që synojnë veçanërisht myslimanët.
EMF e karakterizoi projektligjin, të prezantuar vitin e kaluar nga politikani konservator Michel Savin, si “një fantazi separatizmi” në sport, që mbështetet në “shifra të paqarta dhe margjinale” për të prodhuar një “problem publik”.
“Hapësira publike nuk duhet të bëhet një vend përjashtimi”, shtoi EMF, duke theksuar se sporti duhet të jetë i aksesueshëm për të gjithë.
Përveç ndalimit të shamisë, legjislacioni i propozuar kërkon gjithashtu të ndalojë lutjet kolektive në objektet sportive të financuara nga publiku.
Të martën, Amnesty International u kërkoi gjithashtu ligjvënësve francezë të kundërshtojnë projektligjin.
Në vitin 2022, një tjetër përpjekje për të ndaluar veshjet fetare në sport u refuzua nga Senati francez.
Edhe nëse senatorët mbështesin projektligjin këtë javë, ai duhet të miratohet nga dhoma e ulët e ndarë e Francës për t’u bërë ligj./ AA.
