Sulmuesi anësor i Partizanit, 18-vjeçari Oresti Rifa është huazuar në Kroaci te gjigantët e Hajdukut të Splitit. Ka qenë vetë klubi i kuq që ka konfirmuar gjithçka, me kroatët që kanë mundësinë të blejnë kartonin e lojtarit në fundin e sezonit, kjo në bazë të paraqitjeve të tij.
“FK Partizani me kënaqësi njofton transferimin në formulën e huazimit të Oresti Rifa te Hajduk i Splitit. Marrëveshja mes dy klubeve për kalimin e sulmuesit 18 vjeçar me opsion blerjen e kartonit në fund të sezonit nga kroatët e Hajduk Split është konkretizuar së fundmi.
Rifa një produkt i Akademisë Partizani, prej dy sezonesh ishte pjesë e skuadrës së parë dhe tashmë do të provojë aventurën e re në futbollin kroat”, bën me dije klubi i kuq.
I lindur në Krujë, Rifa ka qenë pjesë e moshave të Akademisë së Futbollit dhe më pas kaloi te ekipi U-15 i Partizanit, para se në verën e 2024 të bashkohej me ekipin e parë.
Ai mori minuta në kualifikueset e Conference League, teksa nuk ka luajtur në asnjë ndeshje të Superligës këtë sezon, por me Partizanin B, aty ku u “pikas” nga klubi kroat. Djaloshi i sulmit është pjesë e Kombëtares U-19.
