Një “bilanc lufte” u regjistroi ditën e djeshme në vendin tonë, pasi 5 persona humbën jetën dhe 4 të tjerë mbetën të plagosur në 4 aksidente të ndryshme.
Aksidenti më tragjik u regjistrua tek kthesae Viroit në aksin Gjirokastër-Tepelenë, ku një kamionçinë tip “Volkswagen Cady” u përplas me një mjet të ushtrisë të tipit “Mad”. Si pasojë e aksidentit, humbi jetën drejtuesi i kamionçinësa Pano Kalanderi 58 vjeç, si dhe pasagjeri që po udhëtonte me të Shefki Salaria.
Mjeti ushtarak po transportonte materiale të arkivit të Gjirokastrës, teksa dyshohet se shkaku i aksidentit ka qenë shpejtësia tej normave të lejuara, si dhe moskujdesia në drejtimin e mjetit.
Policia e Gjirokastrës raportoi ditën e sotme se ka arrestuar drejtuesin e mjetit të ushtrisë, 54-vjeçarin B. Gj., i cili akuzohet për veprën penale “Shkelja e rregullave të qarkullimit rrugor”.
“Në vijim të informacionit paraprak të dhënë ditën e djeshme, për aksidentin e ndodhur në aksin rrugor “Gjirokastër-Tepelenë”, në vendin e quajtur “Kthesa e Viroit”, informojmë se në vijim të veprimeve hetimore, specialistët e Sektorit të Policisë Rrugore arrestuan në flagrancë shtetasin B. Gj., 54 vjeç, banues në Tiranë, për veprën penale “Shkelja e rregullave të qarkullimit rrugor”.”, thuhet në njoftimin e policisë.
Ndërkohë, një aksident tjetër me vdekje u regjistrua edhe në aksin rrugor Marinzë- Suk 1 të Roskovecit, ku dy automjete tip “Mercedez Benz” përplasën një tufë me rreth 31 bagëti të imëta, si dhe dy çobanët që i ruanin, 79-vjeçarin Festim Gllava dhe 32-vjeçarin me iniciale K.H. Fillimisht makinat u përplasën me njëra-tjetrën dhe më pas morën përpara dhe tufën e bagëtive, bashkë me dy çobanët.
Si pasojë e aksidentit, i moshuari humbi jetën në vendin e ngjarjes, ndërsa 32-vjeçari mbeti i plagosur dhe u dërgua në spital.
Policia e Fierit raporti sot se ka arrestuar dy drejtuesit e automjeteve tip “Benz”, shtetasit Qerim Malka, 24 vjeç dhe Luis Malka, 24 vjeç, të dy banues në Roskovec.
“Në vijim të informacionit të dhënë mbi aksidentin e mbrëmshëm, informojmë se specialistët e Sektorit të Qarkullimit Rrugor arrestuan në flagrancë shtetasit Q. M., 24 vjeç dhe L. M., 24 vjeç, të dy banues në Roskovec, pasi me automjetet që drejtonin, kanë përplasur 31 bagëti të imëta që lëviznin në fshatin Suk 1, Roskovec, si dhe 2 çobanët që ruanin bagëtitë, shtetasit F. G., 79 vjeç dhe K. H., 32 vjeç. Si pasojë, ka humbur jetën 79-vjeçari, si dhe është dëmtuar shtetasi K. H., i cili ndodhet në spital, në kujdesin e mjekëve.”, njofton Policia.
Kujtojmë se një tjetër aksident ndodhi rreth orës 19:15, në fshatin Thumanë të Krujës ku një automjet që drejtohej nga një 32-vjeçar, aksidentoi për vdekje një këmbësor 36-vjeç.
Ndërkohë një aksident tjetër ndodhur në orët e para të mëngjesit në autostradën Tiranë-Durrës, që shkaktoi 1 viktimë dhe 3 të plagosur.
