Tirana ia doli të merrte një fitore shumë të rëndësishme ndaj Skënderbeut. Pavarësisht mungesave të shumta që bardheblutë kishin sërish ia dolën të siguronin 3 pikët, ku Bajrovic shënoi golin vendimtar nga pika e bardhë e penalltisë.
Ndaj skuadrës korçare, Bledi Shkëmbi kishte 9-të mungesa. Ndreca dhe Përgjoni rikthehen nga pezullimi, së bashku me Markun. 2 të parët munguan pasi kishin plotësuar numrin 4 të kartonëve të verdhë, ndërsa i fundit u ndëshkua me të kuq në derbi.
Të tre kanë shlyer pezullimet dhe do të jenë nën urdhrat e Bledi Shkëmbit. Ndërkohë klubi me shumë gjasa do të paguajë për dy lojtarë të tjerë. Për Miçin dhe Kozin, drejtuesit pritet të paguajnë për t’i rikthyer në fushë, ndërsa Gjumsi do të jetë i pezulluar edhe për duelin me Teutën, pasi nga Komisioni i Disiplinës dhe Etikës u dëmua me 4 ndeshje.
Gjithashtu mungesa të sigurta janë Soler, Haxhiu dhe Ismajli, të cilët për shkak dëmtimi nuk do të mund të jenë të gatshëm as ndaj teutës. Një “lëmsh” i vërtetë dhe shumë “halle” për Shkëmbin, i cili edhe ndaj durrsakëve duhet të “arnojë” formacionin.
Kujtojmë se sfida me Teutën do të luhet ditën e dielë në “Niko Dovana”. Takim që është i vlefshëm për javën e 26-të të Superirore dhe që do të startojë në orën 17:00.
