Aeroporti “Pearson” në Toronto të Kanadasë ka njoftuar mbrëmjen e së hënës se një incident ka ndodhur me një avion të Delta Air Lines që po mbërrinte nga Minneapolis.
Sipas njoftimit të aeroportit, thuhet se avioni u përmbys teksa po ulej duke shkaktuar plagosjen e 8 personave.
Ata shtuan se po kujdesen për te gjithë pasagjerët dhe ekuipazhin dhe se ekipet e emergjencës tashmë janë në vendngjarje.
Deklarata e aeroportit
“Toronto Pearson është në dijeni të një incidenti gjatë uljes që përfshin një avion të Delta Airlines nga Minneapolis. Ekipet e urgjencës po i përgjigjen çdo lloj situate . Të gjithë pasagjerët dhe ekuipazhi janë nën kujdesin tonë.”
Fotot në rrjetet sociale tregojnë avionin të kthyer përmbys në dëborë.
“Në dijeninë time shumica e pasagjerëve janë jashtë dhe të padëmtuar, por ne ende po përpiqemi të sigurohemi për këtë ndaj jemi ende në vendngjarje duke hetuar”, tha Sarah Patten, zyrtare e Policisë Rajonale Peel në Ontario.
Ajo shtoi se akoma nuk dihen shkaqet dhe rrethanat qe çuan në rrëzimin e avionit.
