Tirana luajti dje përballë Skënderbeut dhe fitoi me anë të penalltisë duke realizuar në minutën 85-të. 3 pikë që gëzuan bardheblutë, që tashmë janë jashtë zonës së ftohtë.
Me rikthimin e Bledi Shkëmbit, Tirana po punon si duhet për mbijetesën. Dy fitore me rivalët direkt, Bylis dhe Skënderbeu, si dhe barazimet ndaj Elbasanit dhe Partizanit tregojnë për besimin që skuadra ka fituar.
Pas pezullimeve të fundit në derbi por edhe prej dëmtimeve, Tirana e pa veten në situatë të pazakontë teksa mungonin 9 lojtarë. Plot 7 lojtarë të stolit ishin nga Akademia. Portieri Harizaj, Bajroviç dhe Tahiri qëndronin si të vetmit lojtarë të transferuar gjatë këtij edicioni.
Në fushë u nevojit aktivizimi i Bajroviç, Mihanës dhe Voglit që rezultuan vendimtarë. Ky i fundit fitoi penalltinë, që u shndërrua në gol nga Bajroviç.
Dhe pse janë vetëm 16 vjeç, Emiljano Mihana dhe Serxho Vogli patën impaktin e tyre të madh për fitoren e katërt në kampionat. Sot, Tirana është jashtë zonës së ftohtë edhe falë adoleshentëve që besoi.
