Një influencuese amerikane ka bërë një deklaratë tronditëse në rrjetet sociale, duke pretenduar se ka lindur një fëmijë nga Elon Musk.
Autorja Ashley St. Clair, 31 vjeçe, u shpreh në një postim në platformën X të premten në mbrëmje se ajo dhe Elon Musk kanë një fëmijë pesë muajsh bashkë.
“Pesë muaj më parë, solla në jetë një fëmijë. Elon Musk është babai,” shkruhej në deklaratën e saj, e cila ishte shoqëruar me përshkrimin “Alea lacta est”, një shprehje latine që do të thotë “Zari është hedhur”.
“Deri tani nuk e kam bërë publike këtë informacion për të mbrojtur privatësinë dhe sigurinë e fëmijës tonë, por ditët e fundit është bërë e qartë se mediat tabloide kanë ndër mend ta zbulojnë, pavarësisht dëmit që mund të shkaktojnë,” shkroi St. Clair.
“Synoj ta lejoj fëmijën tonë të rritet në një mjedis normal dhe të sigurt. Për këtë arsye, u kërkoj mediave të respektojnë privatësinë e fëmijës dhe të shmangin raportimet invazive.”
Musk nuk e ka pranuar publikisht pretendimin e St. Clair. Shefi i DOGE-s, i cili e ndjek St. Clair-in në platformën X, ka bërë disa postime për tema të tjera brenda një ore pas deklaratës së saj të papritur.
Në një postim të mëvonshëm, tri orë më vonë, St. Clair falënderoi mbështetësit dhe tha se do të largohej nga platforma për një periudhë kohe.
“Me gjithë sinqeritetin, e vlerësoj mbështetjen tuaj. Do të doja të mos ndihesha e detyruar të bëja këtë deklaratë. Fëmijët nuk duhet të jenë objekt raportimesh nga gazetarët,” shkroi ajo.
“Do të kaloj kohë me familjen time dhe do të largohem për pak kohë nga rrjetet sociale.”
Nëse konfirmohet, ky do të ishte fëmija i 13-të i Musk-ut me katër gra të ndryshme.
Themeluesi i Tesla-s, me origjinë nga Afrika e Jugut, ka pesë fëmijë me ish-bashkëshorten e tij Justine Wilson, fillimisht binjakët Vivian dhe Griffin, dhe më pas trinjakët Kai, Saxon dhe Damian.
Këngëtarja Grimes dhe Musk kanë tri fëmijë bashkë, duke përfshirë vogëlushin X, i cili është parë shpesh me të atin në Shtëpinë e Bardhë, vajzën Exa Dark Siderael dhe djalin Techno Mechanicus.
Musk dhe ekzekutivja e Neuralink, Shivon Zilis, kanë gjithashtu binjakët Strider dhe Azure, të cilët ishin të pranishëm në takimin e së enjtes me kryeministrin e Indisë, Narendra Modi.
Ndërkohë, St. Clair u pa të mërkurën në ndeshjen e New York Knicks në Madison Square Garden, e veshur nga koka te këmbët me markën Balenciaga, sipas burimeve të “The Post”.
Ajo gjithashtu i dha fund një mungese 40-javore në Instagram duke ndarë një foto të saj në inaugurimin e Trump-it me 20 janar. / New York Post
