Sirena alarmi për Kombëtaren shqiptare. Me kontratën e Sylvinho-s që përfundon në fund të vitit 2025, menjëherë pas përfundimit të kualifikueseve të Botërorit 2026, trajneri mund të largohet. Për shërbimet e 50-vjeçaritinteresohet një prej klubeve më të mëdha braziliane.
Botafogo e ka përfshirë teknikun kuqezi në listën e kandidatëve potencialë për të marrë drejtimin e stolit, duke nisur prej këtij viti. Sylvinho është një prej 12 kandidatëve, ku mes emrave të rëndësishëm është edhe ish-trajneri i Italisë kampione të Europës në vitin 2020, Roberto Mancini.
Fakti interesant është se Sylvinho ka qenë ndihmës i Mancinit te Interi në vitin 2015. I emëruar në stolin e Shqipërisë në janar të vitit 2023, ai e udhëhoqi Kombëtaren drejt kualifikimit në Euro 2024. Tashmë kur përfundoi fushatën në Nations League dhe me kualifikueset e Kupës së Botës që nisin në muajin mars, trajneri mund të kërkojë një aventurë të re.
Kthimi në Brazil është mjaft joshës për Sylvinho-n, që në kampionatin e vendlindjes ka punuar më parë te Corinthians nga viti 2022 deri më2023. Ai e drejtoi ekipin për 43 ndeshje, duke fituar 16 prej tyre.
Mediat latine theksonin se për momentin nuk ka ende një ofertë zyrtare. Megjithatë, drejtuesit e Botafogos kanë nisur kontaktet me stafin e trajnerit kuqezi. Sipas tyre, përfaqësuesit e Sylvinho-s kanë zhvilluar një video-konferencë me biznesmenin John Textor, i cili është edhe aksioneri kryesor i Botafogos, por edhe Crystal Palace dhe Olympique Lyonnais.
Sipas gazetave, pronari amerikan beson se biseda ka qenë pozitive për interesat e klubit.
