Kylian Mbappé po kalon momentin e tij më të mirë si lojtar i Real Madridit, duke shënuar rregullisht si në La Liga, ashtu edhe në Champions League, duke udhëhequr sulmin e “Los Blancos” me golat e tij.
Sulmuesi francez pranon se nuk është e lehtë të luash për Real Madridin, për shkak të pritshmërive dhe presionit që rrethon klubin. “Është e lehtë të thuash se ke ëndërruar të luash për Real Madridin, por në fund ka lojtarë që nën këtë presion nuk e shijojnë lojën”, – deklaroi Mbappé në dokumentarin “Real Madrid, cómo no te voy a querer”, të “Prime Video”, prodhuar nga “Wakai”.
Mbappé shpjegon se për të, presioni nuk është një pengesë, përkundrazi, e ndihmon të performojë më mirë. Ai shpreh mirënjohje për mbështetjen e tifozëve të Realit, që sipas tij e kanë përkrahur edhe para se të vishte fanellën e bardhë:
“Unë e shijoj çdo moment të ndeshjes, e ndiej presionin dhe më pëlqen kjo, sepse e kam të nevojshme për të bërë mirë, për të luajtur mirë, për t’u sakrifikuar për ekipin, për veten, për stërvitjen çdo ditë. Duhet ta ndiej këtë presion, këtë dashuri, sepse mbështetja që më kanë dhënë tifozët e Realit që nga dita e parë, madje edhe më herët, ka qenë e pabesueshme. Ky presion më ndihmon të luaj më mirë, ta shijoj lojën dhe ta ndihmoj ekipin me cilësitë e mia”.
Debutimi i tij me Real Madridin erdhi me një gol kundër Atalantës në finalen e Superkupës së Europës, duke fituar trofeun e tij të parë si “madridista”: “Për mua ishte një moment i madh, sigurisht, por shpresoj të fitojmë edhe më shumë”.
Pas një fillimi sezoni ku u desh të përshtatej me ekipin, rolin dhe pozicionin e tij të ri në fushë, Mbappé ka gjetur tashmë formën ideale, duke shënuar në pothuajse çdo ndeshje. Aktualisht, ai ka realizuar 24 gola në të gjitha kompeticionet:
16 gola në La Liga, duke qenë golashënuesi i dytë më i mirë, me 3 gola pas Lewandowskit.
1 gol në Kupën e Mbretit.
1 gol në Superkupën e Spanjës.
1 gol në Superkupën e Europës.
1 gol në Botërorin e Klubeve.
4 gola në Champions League.
Me këtë ritëm, francezi synon të fitojë trofe individualë dhe ta ndihmojë Real Madridin në garën për titujt sezonalë.
