Partizani ka zbarkuar dje në stërvitjen e radhës në kuadër të përgatitjeve për ndeshjen e së shtunës kundër Egnatias, shumë e rëndësishme për renditjen brenda katërshes. Në seancën e djeshme trajneri Veselinoviç ka nisur lëvizjet taktike dhe analizimin e hollësishëm të skuadrës së Edlir Tetovës.
Trajneri serb me siguri pritet të zgjedhë një strategji ku ta presë Egnatian i organizuar dhe të synojë ta ndëshkojë në daljet e shpejta. Sa i përket formacionit, rreshtimi do të jetë shumë i kushtëzuar për shkak të pezullimeve të shumta dhe mungesave.
Gjatë ditëve të fundit probleme shëndetësore ka shfaqur kapiteni Preka, i cili duket se është prekur nga virozat dhe rrezikon prezencën kundër kryesuesve. Të pezulluar për shkak kartonësh për këtë betejë janë Gudjufi, Taipi, Bytyçi dhe Janjeva.
Lajmi i mirë është Atanaskoski, i cili më në fund është kthyer në stërvitje dhe pritet të jetë i gatshëm nga stoli. Sa i përket dëmtimeve jashtë kësaj sfide mbeten Kote dhe prurja e merkatos, Eleke. Ndërkohë, mbrojtja pritet të ndryshojë thuajse e gjitha, me Osmanllarin dhe Buxhelajn, që pritet të fitojnë një fanellë titullari.
Në mesfushë në vend të Taipit pritet të startojë Mando dhe krah tij Mehmeti e Ismaili. Në sulm me shumë mundësi do t’i besohet një fanellë titullari Vujnoviçit, teksa krah tij priten dy të zakonshmit tashmë, Podstrelov dhe Bintsuka. Në stol opsionet pritet të jenë të pakta.
