Presidenti amerikan Donald Trump e ka lënë të hapur si mundësi që një pjesë e qytetarëve palestinezë të Rripit të Gazës të zhvendosen në Shqipëri.
Në takimin e tij me mbretin e Jordanisë Abdullah, Trump u pyet nga gazetarët nëse ai po merr në konsideratë vende të tjera për të dërguar palestinezët përveç Egjiptit, siç është Shqipëria apo Indonezia?
“Po sigurisht. Ka shumë vende te tjera qe duan te përfshihen”, u përgjigj Trump, duke shtuar se ka pasur edhe shumë shtete të tjera që kanë dashur të përfshihen, ndërsa tha se ka shumë njerëz, mes tyre edhe mbreti i Jordanisë që duan të ndihmojnë në strehimin e palestinezëve të Gazës
Nga ana tjetër Mbreti i Jordanisë deklaroi më pas se ka dijeni se edhe vende Evropiane duan të përfshihen në këtë operacion.
Trump sinjalizoi se nuk do të tërhiqet nga plani i tij që Shtetet e Bashkuara të marrin kontrollin e Gazës, për zhvendosjen e banorëve të saj të tronditur dhe për të transformuar territorin e shkatërruar nga lufta.
“Do ta marrim. Do ta mbajmë dhe do ta ruajmë. Do ta marrim eventualisht, do të krijojmë shumë vende pune për banorët e Lindjes së Mesme”, tha Trump duke iu referuar Gazës. Ai shtoi se plani i tij do “të sjellë paqe” në rajon.
Kjo deklaratë e Donald Trump, vjen pasi Edi Rama e ka mohuar vazhdimisht se Shqipëria është një prej vendeve në listë që mund të strehojë 100 mijë palestinezë të Rripit të Gazës, nëse plani i Donald Trump dhe Benjamin Netanyahu refuzohet nga Jordania, Egjipti dhe vendet e tjera të afërta.
Pak ditë më parë, Rama e ka konsideruar një sajesë që ka ardhur si një zë “kua…kua” nga këneta. Gjithsesi, duhet theksuar se ishte gazetari i Kanalit 12 të Izraelit, ai i cili raportoi se Shqipëria është në bisedime me administratën Trump për të strehuar 100 mijë izraelitë.
“Po pse, për çfarë arsye? Apo se kështu ka ardhur një zë kua…kua nga këneta. Jo! Është sajesë që mori rrugën, se jemi në atë kohë kur e përditshmja jonë, ku gënjeshtra bën xhiron e botës. E vërteta është pak e mërzitshme. Prirja për të besuar lezetet e gënjeshtrës është më e madhe. Rrej, rrej, rrej dhe bëj qejf.” – tha Rama.
Kujtojmë se më 16 Janar, Shqipëria priti një familje të evakuuar nga Gaza duke u bërë pjesë e një operacioni ndërkombëtar humanitar pasi fëmija i tyre 1-vjeçar kishte nevojë për kujdes shëndetësor.
