Kosova voton në zgjedhjet parlamentare/ Problematikat dhe pjesëmarrja

Në zgjedhjet e sotme parlamentare që po mbahen në Kosovë, 28 subjekte politike me 1.280 kandidatë, konkurrojnë për mbështetjen e rreth dy milionë votuesve për të siguruar ulëse në parlamentin 120 vendësh.

20 nga këto vende u takojnë pakicave kombëtare nga të cilat 10 janë për komunitetin serb, nga radhët e të cilit konkurrojnë 6 subjekte politike.

Mbi 940 qendra votimi do të jenë të hapura deri në orën 19:00, ndërsa mbi 100 të dërguar të Bashkimit Evropian dhe 18 nga Këshilli i Evropës u janë bashkuar vëzhguesve të tjerë vendas e ndërkombëtarë që do të ndjekin nga afër procesin e votimeve.

• Mbyllet procesi i votimit/ KQZ publikon shifrat: Ja sa persona kanë votuar

Qendrat e votimit në Kosovë janë mbyllur në orën 19:00, duke përmbyllur kështu edhe procesin zgjedhor.

Komisioni Qendror i Zgjedhjeve ka procesuar 90 për qind të vendvotimeve apo 2286 nga 2533.

Sipas të dhënave në faqen zyrtare të KQZ-së, nga 1 milion e 970 mijë e 944 persona me të drejtë vote, kanë votuar 786 mijë e 462 qytetarë apo 39.90 për qind.

Sipas të dhënave, nga 1,970,944 qytetarë të regjistruar kanë votuar vetëm 642,838 qytetarë.

• Numërohen 50.89% të kutive të votimit/ REZULTATET

Deri në orën 21:30, janë numëruar 50.89 për qind të kutive të votimit, në kuadër të zgjedhjeve parlamentare të 9 shkurtit.

KQZ ka publikuar rezultatet e numërimit të votave, ku janë numëruar 1289 nga 2,533 duke nxjerrë LVV parti të parë, PDK e dyta dhe më pas LDK

Nga kjo përqindje e numëruar, Lëvizja Vetëvendosje kryeson me 37.5 për qind të votave.

Partia Demokratike e Kosovës pason në 29.8 për qind, Lidhja Demokratike e treta me 16.29 për qind të votave ndërsa Koalicioni AAK-Nisma ka 7.92 për qind.

• DnV raporton për disa probleme gjatë procesit të votimit

Koalicioni i organizatave joqeveritare, Demokracia në Veprim, ka raportuar për disa probleme gjatë procesit të votimit për zgjedhjet parlamentare.

Eugen Cakolli nga DnV tha se votuesit kanë deklaruar se ngjyra matrikuluese po fshihet lehtësisht nga gishtërinjtë e tyre dhe kjo çështje sipas tij mund t’i japë rrugë votimit të dyfishtë.

Një gjë e tillë, sipas Cakollit, “do minonte besimin e publikut, por edhe integritetin zgjedhor”.

Në konferencën për media, Cakolli tha se ka disa mekanizma që sigurohet që votuesit të mos votojnë dy herë, por theksoi se “problemi te fakti fshirja e lehtë e ngjyrës matrikuluese mund të krijojë perceptim qytetarë procesi nuk ka qenë i rregullt dhe mund të ketë pasur raste të tilla”.

KQZ-ja në dy konferencat e mbajtura deri më tani nuk ka adresuar problemin e ngritur nga vëzhguesit sa i përket ngjyrës matrikuluese.

Gjatë konferencës, DnV-ja tha se ka vërejtur edhe probleme të tjera gjatë procesit zgjedhor, që tha se nuk dëmtojnë integritetin e zgjedhje.

Problemi më i theksuar gjatë procesit të votimit deri në mesditë, sipas Cakollit është mosgjetja e emrave të votuesve në listat e votuesve.

DnV ka 500 vëzhgues në mbarë vendin dhe Cakolli tha se janë vërejtur edhe probleme kur nuk është regjistruar që një votuesit i është ofruar asistencë me votim.

Po ashtu, ndonëse në një nivel dukshëm më të vogël, Cakolli tha se edhe në këto zgjedhje fenomeni i fotografimit të votës është prezent dhe thanë se raste të izoluara të fotografimit të votave janë regjistruar në 4 për qind të vendvotimeve.

Cakolli po ashtu u shpreh kritik për çështjen e vendosjes së kabinave të votimit. Ai tha se në mëngjes kabinat u vendosën sipas rregullave, por vëzhguesit më pas kanë hasur në raste kur persona të identifikuar si staf i KQZ-së kanë kërkuar që kabinat të vendosen përballë njëra-tjetrës, që sipas tij përbën shkelje të privatësisë.

• Votimi nga diaspora, 75.54% e qytetarëve votuan në përfaqësitë diplomatike, mbi 50 mijë pako përmes postës

Zëdhënësi i KQZ-së, Valmir Elezi ka bërë të ditur gjithashtu edhe numrin e qytetarëve në diasporë që kanë votuar në përfaqësitë diplomatike.

“Siç e kemi përmendur disa herë gjatë procesit të regjistrimit të votuesve nga 104 mijë e 924 votues, 84 mijë e 600 kanë përzgjedhur mënyrën e votimit përmes postës dhe 20 mijë e 324 kanë qenë të regjistruar për të votuar fizikisht në përfaqësitë diplomatike. Lidhur me votimin në përfaqësitë diplomatike që u përmbyll gjatë ditës së djeshme ju njoftojmë se nga 20 mijë e 324 votues që ishin regjistruar për këtë mënyrë votimi në 30 përfaqësitë e Republikës së Kosovës kanë votuar 15 mijë e 352 votues apo 75.54%”, ka thënë Elezi.

Ai ka shtuar se sa i përket pjesës tjetër të votimit përmes postës ky proces gjithashtu është mbyllur dje.

“Nga informacionet që kemi nga Posta respektivisht për tetë kutitë postare nga Gjermania, Zvicra, Turqia, Austria, Mbretëria e Bashkuar, Mali i Zi, Maqedonia e Veriut dhe nga posta e KQZ-së në Kosovë numri pakove që janë pranuar në këto kuti postare është 50 mijë e 226, por ky numër nuk është përfundimtar pasi që të dhënat nuk janë nga të gjitha kutitë postare”, tha Elezi.

Elezi theksoi se këto pako me fletëvotime i nënshtrohen procesit të verifikimit nëse i takojnë votuesve të regjistruar dhe nëse janë ndjekur procedurat tjera të parapara.