Ka përfunduar në pranga gardian i burgut të sigurisë së lartë në Fushë Krujë, Hidër Çali.
Top Channel ka siguruar foto nga mjetet e paligjshme, që do të futeshin në burgun e Fushë-Krujës.
Brenda qeses së zezë, ndodheshin 22 celularë, së bashku me karikues dhe kufje, si dhe 3 doza kokainë. Nga pamjet duket qartë se si sendet ishin mbështjellë me qese, për t’u dukur si mbeturina.
Dyshohet se pakon do të fuste në burg një polic, duke shfrytëzuar momentet e ndërrimit të turnit.
Hider Çali, njofton Drejtoria e Përgjithshme e Burgjeve, gjatë ndërrimit të shërbimeve, hodhi një qese të zezë rreth 6 kg në një nga tarracat, me synimin për ta futur më pas në regjimin e brendshëm. Por plani i tij dështoi dhe pas evidentimit të qeses, policët gjetën dozat e kokainës dhe celularët.
