Skënderbeu arriti të mundë në transfertë Dinamon me rezultatin 2-0 në raundin e parë të çerekfinaleve të Kupës së Shqipërisë.
Në përfundimin e takimit, trajneri i dinamovitëve Ilir Daja doli në prononcim për mediat.
“Nuk besoj se skuadra e ka marrë lehtë sepse e dinin të gjithë që një nga objektivat e klubit është dhe Kupa.
Problemi ishte se pas golit të parë, dhe për meritë të Skënderbeut që mbrohej me bllok poshtë, ne duhet të ishim shumë të kujdesshëm që të kishim ekuilibra si në pjesën e parë, kur nuk lamë aksione të kundërshtarit për të na rrezikuar.
Atë duhet të bënim dhe në pjesën e dytë, duhet të ishim më të durueshëm. Kur një ekip mbrohet me bllok poshtë dhe ka lojtarë të shpejtë në kundërsulm, gjithë kohës duhet të jemi në ekuilibër.
Kjo gjë na mungoi, pas pësimit të golit të parë erdhi dhe ai autogol që janë pjesë e lojës. Në gjithë këto javë, do kemi dhe ne 1 ditë jo, për shkak edhe të atyre mungesave që për ne janë shumë të rëndësishme.
Duke filluar nga kapiteni, edhe Teqja sot ka luajtur me temperaturë dhe dje nuk ka qenë në grumbullim me ekipin.
Ky është futbolli, pa i mohuar asnjë moment dhe meritën Skënderbeut sepse atë që kërkoi dhe e mori. Ajo që besoj unë, është se në këtë moment kemi pak alternativa për repartin e sulmit, aty ku dhe mund të kishim bërë zëvendësime”, u shpreh Daja për “News 24”.
