Një i ri është arrestuar nga Policia e Tiranës, pasi shiste në dyqanin e tij monopatina dhe biçikleta elektrike të dyshuara të vjedhura.
Në kuadër të operacionit policor të koduar “Brand” është vënë në pranga shtetasi Niki Xara, 27 vjeç, banues në Tiranë, i cili akuzohet për veprën penale “Përvetësimi i parave ose mallrave që rrjedhin nga vepra penale ose veprimtaria kriminale”.
Blutë e kryeqytetit raportojnë se gjatë operacionit është ushtruar kontroll në dyqanin në pronësi të 27-vjeçarit, ku janë gjetur dhe sekuestruar në cilësinë e provës materiale 74 monopatina, 3 patina elektrike dhe 3 biçikleta elektrike, të dyshuara të vjedhura.
Policia po vijon veprimet hetimore për identifikimin e autorit/ëve të vjedhjes së monopatinave dhe biçikletave elektrike dhe dokumentimin e plotë të kësaj veprimtarie kriminale.
Materialet procedurale i kaluan Prokurorisë së Tiranës për veprime të mëtejshme.
