Janë zbardhur detaje të reja nga arratisja nga burgu i Shënkollit në Lezhë i 49-vjeçari nga Çorovoda me banim në Tiranë, Daut Laze.
Ai ishte arrestuar që prej 16 Nëntorit të vitit 2021 për veprën penale “Dhuna në familje” dhe më 4 nëntor të vitit të kaluar Gjykata e Tiranës kishte vendosur ndaj tij masën mjekësore “Mjekim i detyruar në një institucion mjekësor”. Dyshohet se ai vuan nga probleme të shëndetit mendor.
Burime bëjnë me dije se nga kqyrja e kamerave të sigurisë rezulton se Daut Laze nuk është ndihmuar nga persona të tjerë për t’u arratisur nga burgu.
Ai ka shfrytëzuar momentet kur ka qenë në sektorin e trajtimit mjekësor dhe nuk ka pasur staf të burgut pranë tij duke dalë jashtë në ajrim. Atje ka marrë një llamarinë dhe duke e mbështetur te muri mbi 4 metra të lartë, është ngjitur nëpërmjet llamarinës dhe ka kapërcyer murin. Më pas ka kaluar edhe rrjetën rrethuese dhe është larguar me vrap në arat fushore pranë burgut të Shën Kollit.
Në përfundim të veprimeve të kryera dhe analizimit të situatës, Shërbimi i Kontrollit të Brendshëm ka arrestuar punonjësit Gjin Ndoka, punonjës shërbimi në kupole, Mark Nikolli punonjës ne sektor (grup sigurie) dhe Zhaneta Mella (operatore kamerash). Kjo e fundit është shtruar në spitalin rajonal të Lezhës, pasi pas ndalimit ka shfaqur probleme shëndetësore.
Ndërkohë, burime bëjnë me dije se deri më tani nuk rezulton asnjë gjurmë nga Daut Laze, pavarësisht kontrolleve të ushtruara nga Policia në zonën pranë burgut të Shën Kollit, në Lezhë, Tiranë, Çorovodë, por edhe në qytete të tjera.
Autoritetet kanë vendosur 10 mijë euro shpërblim për këdo që jep informacion të vlefshëm për kapjen 49-vjeçarit, por deri më tani ky vendim duket se nuk ka ndihmuar për të çuar në lokalizimin e tij.
Familjarët e Daut Lazes që jetojnë në zonën e Astirit në Tiranë shprehen se nuk kanë dijeni se ku ndodhet ai, pasi nuk kanë pasur asnjë kontakt me të që në momentin që janë njoftuar për arratisjen.
E pyetur nga gazetarët, nëna e Lazes ka mohuar që të ketë pasur ndonjëlloj kontakti me të birin pas arratisjes së këtij të fundit nga burgu i Shënkollit.
“Jam nëna. S’ka telefonuar. Nuk kemi asnjë haber fare, po të kisha do të thosha”, – është shprehur nëna e 49-vjeçarit për mediat.
Autoritetet po vijojnë kontrollet për kapje Daut Lazes, teksa ky i fundit konsiderohet si një person me rrezikshmëri të lartë shoqërore p♪7r shkak të problemeve mendore.
Arratisja e Daut Lazes nga burgu i Shënkollit, flet e ëma: S’kemi asnjë haber, nuk dimë ku ndodhet
