Gjatë një kontrolli të kryer në pjesën veriore të Mitrovicës, Policia e Kosovës ka gjetur armë dhe municione të kalibrave të ndryshëm. Armët dhe municionet ishin fshehur në një kotec pulash në oborrin e një shtëpie.
Policia sqaron se ka pasur informacione për një lokacion ku gjenden armë, ndaj njësitet policore kanë ndërmarrë veprimet e menjëhershme ku kanë kryer një kontroll në një lagje afër lumit Ibër, përkatësisht tek Shkëmbi i Dudës në qytetin e Mitrovicës Veriore.
“Gjatë kontrollit të realizuar në atë pjesë në një kotec pulash policia ka gjetur dhe konfiskuar një armë te gjatë AK-47, dy karikator të së njëjtës armë me nga 30 fishekë, 473 fishekë të pistoletës, 40 fishekë të armës së gjuetisë, 12 fishekë të kalibrave të ndryshëm të armës së gjatë, një thikë taktike, një komplet i pajisjeve për pastrimin e armës dhe një çantë e zezë”, thuhet në njoftim.
Në lidhje me rastin policia ka shoqëruar të dyshuarin me iniciale Z.T., i moshës 68-vjeçare i cili është intervistuar në prezencën e avokatit mbrojtës.
Sipas policisë, të gjitha veprimet e ndërmarra i janë paraqitur Prokurorit të Shtetit i cili ka urdhëruar inicimin e rastit “Mbajtja në pronësi, kontroll ose posedim i pa autorizuar të armëve”, ndërsa i dyshuari pas intervistimit me urdhër të prokurorit është liruar.
