Ka mbërritut në Tiranë trupi i pajetë i kryepeshkopit të Kishës Ortodokse të Shqipërisë, Anastas Janullatos. Qindra besimtarë e kanë pritur Kryepeshkopin me lule dhe gjethe dafine.
Arkëmorti u shoqërua nga klerikët e vendit dhe u dërgua në katedralen “Ringjallja e Krishtit”, ku do të mbahen homazhe dhe ditën e enjte do të mbahet edhe ceremonia mortore.
Në homazhet për Kryepeshkopin Anastas do të marrë pjesë edhe kryeministri grek, Kyriakos Mitsotakis, i shoqëruar nga 5 ministra të kabinetit të tij qeveritar.
Pjesëmarrëse do të jenë të gjitha mitropolitë e vendit, përfaqësues nga ambasadat e huaja në vendin tonë, delegacion nga Vatikani, përfaqësues të komuniteteve të tjera fetare, Patriarku i Izraelit, i Aleksandrisë dhe i Qipros si dhe përfaqësues nga nivelet e larta nga Kishat e Krishtera në mbarë botën.
Kryepeshkopi e kishte lënë amanet që të prehej në Shqipëri për dekadat që ka kaluar në vendin tonë, ku prej vitit 1992 është vendosur në krye të Kishës Ortodokse Autoqefale. Gjithashtu është dhe një rregull i Kishës Autoqefale, që Kryepeshkopët të prehen në vendin ku kanë shërbyer, jo në vendin e lindjes.
Kryepeshkopi Anastas Janulltos u nda nga jeta në moshën 95-vjeçare në Spitalin “Evangelismos” të Athinës mëngjesin e të shtunës, ku ishte i shtruar prej më shumë se 20 ditësh.
Anastas Janullatos u shtrua fillimisht në një spital në Tiranë më 30 Dhjetor pas një infeksioni të rëndë dhe më 3 Janar kryepeshkopi u transferua drejt Athinës.
Rreth një javë para se të ndërronte jetë, ai iu nënshtrua një operacioni për ndalimin e gjakderdhjes. Gjatë kësaj kohe dhe pas operacionit, Kryepeshkopi ka qenë në intubim, ku mjekët tentuan ta nxirrnin nga intubimi, por përpjekjet rezultuan të pasuksesshme.
Në këto rrethana, bluzat e bardha vendosën që kryepeshkopi t’i nënshtrohej trakeostomisë, që është një procedurë e nevojshme në rastet e intubimit të zgjatur mbi 15-20 ditë. Përmes kësaj procedure kirurgjikale, bëhet një hapje në trake apo në grykë për të krijuar frymëmarrje.
Por, mëngjesin e të premtes gjendja e tij u përkeqësua ndjeshëm pasi pësoi dështim shumëorganësh, të cilës nuk i mbijetoi dot duke ndërruar jetë.
Anastas Janullatos u caktua në 1991 nga Patriarku Ekumenik Eksark, Patriarkal në Shqipëri. Vizitën e parë në vendin tonë ai e bëri më 16 korrik 1991.
U fronëzua në krye të Kishës Ortodokse Autoqefale Shqiptare më 2 gusht 1992, plot 33 vite më parë në moshën 63 vjeçare duke i rezistuar referendumit të vitit 1994 ku qeveria e atëhershme futi në projektligj një nen që i ndalonte udhëheqësit fetarë me nënshtetësi të huaj të ushtronin detyra fetare. Me 6 nëntor Referendumi u rrëzua me votë popullore.
