Tirana ka marrë një fitore të rëndësishme në transfertë përballë Bylisit, në ndeshjen e vlefshme për javën e 22-të të Superiores.
Sfida e zhvilluar në “Adush Muça”, përfundoi 0-2 në favor të bardhebluve. Pas kësaj sfide ka folur trajneri fitues, Bledi Shkëmbi.
“Po luanim kundër një kundërshtari që ishte më në formë për momentin, ndoshta skuadra më e fortë. Arritëm të bënim atë që besonim se mund ta bëjmë. Por është shumë pak akoma, s’duhet të fluturojmë. E dija që do të kishim vështirësi, por e rregulluam. Nuk bëmë një ndeshje perfekte, por duhet dhe kemi mundësi të bëjmë më shumë. Për fat të mirë sot dolëm për të shënuar dhe shënuam.
Rafa Silva? Po është një lojtar që ka ardhur në janar, por unë e gjeta në skuadër. Patjetër që mora informacionet për mënyrën e lojës. Një lojtar që më ka pëlqyer për atë ç’ka unë mendoja se mund të luajmë më mesfushë. Unë nuk e prisja që të ishte në këtë nivel.
Ishte pak e pamenduar nga ana ime për rikthimin, por unë lashë diçka në mes që mendoja se do e bëja mirë. Kjo ishte arsyeja e vetme që kur ma kërkuan u riktheva. Unë dua të luaj një futboll të bukur dhe të fitoj me një futboll të bukur. Sot e para ishin arsyet psikologjike, pasi skuadra nuk mund të luajë një futboll të bukur. E dyta është kundërshtari, si sot që ishte agresiv. Do mundohemi të luajmë futboll të mirë, të bukur, por edhe pikët.
Ernest me karton të kuq? Unë nuk e kam parë akoma situatën, por i thashë që duhet të kesh kujdes. Nuk kam parë asgjë i thashë, por në situatën që jemi dëmton skuadrën. Çdo futbollist duhet ta mendojë mirë”, tha Shkëmbi.
