Gjykata e ekstradimeve në Londër i dha dritën jeshile drejtësisë shqiptare për të ekstraduar në vendin tonë edhe britanikun tjetër, Steven Hunt, i përfshirë në grupin e survejimit që ndihmojë në vrasjes e biznesmenit Ardian Nikulaj në Shëngjin.
Avokatët e Steven Hunt për të bllokuar ekstradimin ngritën pretendimin se ai është diagnostikuar me një sëmundje onkologjike, pas arrestimit në Londër disa muaj pas vrasjes së Nikulajt. E për këtë gjykatësi u dha kohë dhe nuk e mori një vendim më 27 Gusht 2024 kur lejoi ekstradimin e Edmond Haxhisë, Thomas Mithan, Harry Simpson dhe Harriet Bridgeman.
Gjyqtari Daniel Sternberg i gjykatës City of Westminster Magistrate Court shprehet në vendim se “Shqipëria ofron kushtet e duhura në paraburgim apo edhe burgje për persona të cilët vuajnë nga të tilla sëmundje”.
Do të jetë Gjykata e Lartë në Londër ajo e cila do të thotë fjalën e fundit për ekstradimin e Edmond Haxhisë, Thomas Mithan, Harry Simpson, Harriet Bridgeman dhe Steven Hunt në muajt në vazhdim. Ndaj tyre prokuroria e Lezhës ngriti akuza për vrasje në bashkëpunim.
Ruben Saraiva i akuzuar si ekzekutuesi Ardian Nikulajt, u ekstradua nga Maroku në Dhjetor 2023 dhe muajt e shkuar ndaj tij nisi procesi gjyqësor në Gjykatën e Lezhës.
E ndërsa prokuroria e Lezhës identifikoi grupin e survejimit ardhur nga Anglia nën udhëheqjen e Edmond Haxhisë dhe tashmë ka në bankën e të akuzuarve vrasësin, hetimet në bashkëpunim me policinë britanike e më konkretisht atë të Birmingamit, janë përqendruar tek porositës e vrasjes.
Informacionet e mbledhura nga policia dhe prokuroria e Lezhës, sugjerojnë se për të realizuar këtë vrasje janë investuar rreth 1 milion euro nga ata të cilët ishin në gjak me familjen Nikulaj./Tch
