Personat që shihni në foton e mësipërme janë 35-vjeçari, Kujtim Ukaj nga Kruja dhe 26-vjeçari Abdurrahman Rizvani nga Mati, të cilët u kapën nga Policia e Tiranës gjatë një operacioni anti-droge të koduar “Interruption 2”.
Ata u kapën duke transportuar 6 thasë me kanabis sativa, me peshë totale 60 kilogramë. Droga ndodhej në bagazhin e automjetit që drejtohej nga Kujtim Ukaj. Ndërsa, i arrestuari tjetër Abdurrahman Rizvani drejtonte një tjetër automjet, i cili sipas Policisë kontrollonte rrugën dhe njoftonte Kujtim Ukajn, nëse kishte prezencë të Policisë.
Dy automjete u ndaluan nga uniformat blu në Luz të Fushë Krujës, teksa në kërkim është shpallur bashkëpunëtori i tyre, shtetasi S. D., 28 vjeç.
Droga është sekuestruar në cilësinë e provës materiale, bashkë me dy automjetet, dy celularë dhe një shumë parash.
Burime bëjnë me dije se hetimet për këtë grup vijonin prej disa muajsh, teksa lënda narkotike dyshohet se ishte kultivuar në Fushë Arrëz dhe do të shitej me shumicë në Kamëz.
Burime bëjnë me dije se një kilogram i kanabisit do të shitej në vlerë 1200 euro, që në total përkthehet në 72 mijë euro.
