Dhjetëra raste të abuzimit seksual nga anëtarët e klerit gjatë gjashtë dekadave janë zbuluar në një raport të pavarur mbi një dioqezë veriore të Italisë, raportoi Reuters.
Sipas agjencisë britanike, hetimi shkoi më thellë se raportet e publikuara nga Kisha Katolike Italiane.
Ndërsa peshkopët italianë janë kritikuar për publikimin e raporteve të abuzimit që mbulojnë vetëm periudhën 2020-2022, Dioqeza e Bolzano-Brixen hetoi rastet nga viti 1964, kur u themelua, deri në vitin 2023.
Bolzano-Brixen i përket zonës gjermanishtfolëse të Tirolit të Jugut, në kufi me Austrinë, dhe ka qenë më aktive për këtë çështje se dioqezat e tjera italiane, dhe në vitin 2010, ishte e para që hapi një zyrë për raportimin e rasteve të abuzimit seksual të kryer nga priftërinjtë.
Raporti është porositur nga një firmë ligjore gjermane, është 631 faqe dhe bazohet në arkivat dhe intervistat e kishës.
U gjetën 67 raste të mundshme abuzimi, duke përfshirë 53 të mbështetura me prova të forta ose të besueshme.
Rastet kanë të bëjnë me 41 priftërinj, që është 4,1 për qind e klerit që ka punuar në dioqezë gjatë asaj periudhe.
Prifti, i cili dyshohej se kishte abuzuar me vajza nga mosha 9 deri në 12 vjeç që nga vitet 1960, mbeti “i paprekur” deri në vitin 2010, kur peshkopi vendas e detyroi të dilte në pension, thuhet në dokument.
Ai nuk u përball me procedimet penale italiane për shkak të parashkrimit dhe gati 50 vitet që ai i gëzoi pa u ndëshkuar zbulojnë, sipas autorëve, “të gjitha aspektet e dështimit të përgjithshëm sistemik të kishës”, thuhet në raport.
