Tashmë është e konfirmuar se Carlo Ancelotti do të largohet në fund të sezonit nga stoli i Real Madrid-it. “Los Blancos” do të kenë trajner të ri sezonin e ardhshëm dhe që tani kanë filluar të dalin në skenë kandidatët e mundshëm për të zëvendësuar italianin.
Kandidati i parë dhe favoriti absolut është Xabi Alonso, i cili ka bërë një punë të jashtëzakonshme te Bayer Leverkusen dhe iu ka bërë të ditur drejtuesve të “Aspirinave” që do të largohet në fund të sezonit. Vizioni i tij strategjik si trajner dhe e kaluara e tij si lojtar i Real Madrid-it e bëjnë atë padyshim njeriun ideal për të drejtuar klubin madrilen.
Në rast se ndodh surpriza dhe Xabi Alonso nuk vjen te Real-i, klubi madrilen ka dy opsione të tjera që janë figura po brenda shtëpisë. I pari është Zinedine Zidane, i cili nuk ka pranuar të drejtojë asnjë klub tjetër që nga koha kur u largua pikërisht nga Real-i, por francezi me shumë mundësi po pret t’i besohet stoli i Kombëtares së tij, pasi Didier Dechamps do largohet zyrtarisht me përfundimin e Kupës së Botës në vitin 2026.
Alternativa e tretë është legjenda e madrilenëve, Raul Gonzalez, i cili aktualisht drejton Real Madrid Castilla, por nuk do ishte befasi nëse do i bësohej dhe drejtimi i ekipit të parë. Mediat spanjolle raportojnë se Florentino Perez nuk do presë përfundimin e sezonit por do ta zyrtarizojë trajnerin e ri shumë më shpejt, pavarësisht se ai do të marrë drejtimin e ekipit në verë.
