Shtatë herë kampioni i botës dhe piloti më i suksesshëm në historinë e Formula 1, Lewis Hamilton, nisi zyrtarisht aventurën te Ferrari. Në ditën e tij të parë si pjesë e prodhuesit legjendar të makinave sportive, britaniku vizitoi selinë qendrore në Maranelo.
Kjo edhe rreth një vit pas njoftimit befasues se do tëlargohej nga Mercedes, skuderia ku fitoi gjashtë nga shtatë titujt kampion të botës. Në moshën 40-vjeçare, ai ka marrë përsipër misionin e vështirë që ta kthejë Ferrarin në majat e Formula 1.
“Ka disa të cilat mbahen mend përgjithmonë dhe kjo ditë e parë si pilot i Ferrarit është një prej tyre”, shkruante Hamilton në profilin e tij në Instagram.
“Jam me fat që në karrierën time kam arritur gjëra të cilat nuk mund t’i imagjinoja, por një pjesë e imja ka ëndërruar gjithmonë të garonte me ngjyrën e kuqe. Po realizoj një ëndërr dhe nuk mund të jem më i lumtur se kaq”, shtoi britaniku.
Në ditën e parë me Kokëkuqen, Hamilton mori përmasat për sediljen e makinës, si edhe provoi simulatorin e garave. Për shkak të kushteve atmosferike, ai pritet që të zbresë në pistë me makinën e re vetëm në mesjavë.
Testet zyrtare në Formula 1 do të nisin në Bahrein, nga data 26 deri më 28 shkurt. Edicionin e kaluar, piloti britanik regjistroi paraqitjen më të dobët në renditje, duke u pozicionuar vetëm në vendin e shtatë, megjithatë arriti të fitonte dy gara pas dy sezoneve. Përkrah tij te Ferrari, piloti tjetër do të jetë Charles Leclerc.
