Në protestën e mbrëmjes së sotme përballë Ministrisë së Brendshme, kreu i Lëvizjes Bashkë Arlind Qori tha se shteti është i kapur nga oligarkët.
Qori solli rastin e policit Azbi Spahiut, kur tha se sot ai është viktimë e sistemit dhe tha se efektivi i Rrugores u detyrua që të dëmtonte veten.
“Organizatat mafioze dhe shtetet totalitare i bashkon heshtja dhe frika. Në organizatat mafioze dhe shtetet totalitare, viktima duhet të heshtë, dhe kur nuk mund te heshtë më, viktima duhet të shfajësojë shkaktarët e dhunës ndaj tij dhe në rastin më të keq, viktima duhet të fajësojë veten e vet.
Kjo organizatë mafioze, e ka shoqëruar Shqipërinë këto ditë, që kur polici Azbi Spahiu, i ndjerë në presion dhe shantazh se bëri detyrën e tij, u detyrua të dëmtonte veten dhe të gjithë sot janë në presion, që askush mos thotë asnjë fjalë.
Këto ditë kanë vërtetuar atë që lëvizja Bashkë ka vite që e thotë: Shteti është i kapur nga oligarkët”, tha Qori.
