Përmes një dekreti presidencial, Presidenti në detyrë edhe për pak orë i SHBA-së, Joe Biden, ka nënshkruar një urdhër ekzekutiv për një falje parandaluese ndaj Anthony Faucit, Gjeneralit Mark Milley dhe anëtarëve të tjerë të Kongresit që ishin pjesë e komitetit për hetimin e sulmit të 6 Janarit 2021 në Capitol.
Sipas mediave amerikane, Biden ka shfrytëzuar një prerogativë presidenciale të jashtëzakonshme ekzekutive ndaj këtyre anëtarëve për të qenë të mbrojtur nëse Presidenti i ardhshëm Donald Trump vendos të hakmerret ndaj tyre.
Dekretet presidenciale për falje parandaluese janë të paprecedenta në historinë e presidencës amerikane të viteve të fundit. Disa orë përpara se të dorëzojë pushtetin, Joe Biden tha se “këto janë rrethana të jashtëzakonshme”.
Këto lloj dekretesh shërbejnë për të mbrojtur disa kritikë të hapur të Presidentit Trump, për disa prej të cilëve, ky i fundit është zotuar se do t’i ndëshkojë.
“Hetimet e pabaza dhe të motivuara politikisht shkaktojnë kaos në jetët dhe sigurinë e individëve të caktuar dhe familjeve të tyre”, tha Biden duke ju referuar paralajmërimeve të Trumpit ndaj kritikëve.
Megjithatë, Joe Biden vuri në dukje se pavarësisht dekreteve parandaluese të faljeve, nuk kupton që personave të cilëve u është dhënë ky dekret janë fajtorë.
