Gazetarja Ola Xama, e ftuar në emisionin “Të Paekspozuarit” ka folur për marrjen e statusit investitor strategjik nga kompania e lidhur me dhëndrin e Trump, Jared Kushner, për të ndërtuar hotele dhe resorte në ishullin e Sazanit.
Xama tha se investimi 1.4 miliardë euro, do të jetë në një pjesë të ishullit, ndërkohë që shteti shqiptar do të jetë bashkëaksioner, por ende është e paqartë se në çfarë përqindje.
Ajo shtoi më tej se ende nuk është dorëzuar një projekt konkret, teksa paratë që do të investohen janë të arabëve.
“Procedura e veçantë, të lind e drejta të bëhesh edhe pronar i tokës. Gjithë fondi i pronës, transferohet te fond i përbashkët mes investitorit strategjik dhe Korporatës së Investimeve. Dimë që pas kompanisë është Jared Kushner. Kompania është offshore, e themeluar në Delaware. Nuk është Affinity Partners që doli në fillim. Me atë që është bërë publike kjo kompani ka kapital 2.5 miliardë euro, 1.4 miliardë do të investohen në ishullin e Sazanit. Ka një projekt të dytë të konfirmuar publikisht nga Ivanka Trump dhe Jared Kushner për një restort në Zvërnec, por nuk ka ende një aplikim.
Bëhet fjalë për të ndërtuar një resort me vila dhe hotele, 45 hektarë tokë është sipërfaqja. Do të ndërtohen hotele dhe resorte nga 5 deri në 7 yje.
Ajo që pashë, nuk është dorëzuar një projekt konkret. Autorizohet nga ky vendim grupi negociator ndërministror për të negociuar projektin dhe biznes-planin. Është dhënë një aplikim në letër dhe ky aplikim është miratuar. Paratë janë, fondet janë të arabëve, do ti ndërtojnë amerikanët e lidhur me fijet e Trump.
Edhe kompanitë amerikane, që e marrim si model të demokracisë, kemi një ligj përjashtues dhe favorizues, ligji i investimeve strategjike, që të përjashton nga taksa e ndikimit në infrastrukturë, redukton TVSH dhe fal tatim fitim për 10 vite. Ne përfitojmë investimin 1.4 mliardë euro dhe do të jetë i njëjti model zhvillimi si në Portin e Durrësit ku shteti do të bëhet bashkëaksioner, por se sa përqindje ndahet i mbetet negociatave”, tha Xama.
