Bayern Munich duket se ka gjetur pasardhësin e Manuer Neuer, kontrata e të cilit skadon në fund të sezonit, por pritet të rinovohet dhe për një vit tjetër, pra deri në verën e vitit 2026.
“Sky Germany” raporton se klubi bavarez ka rënë dakord me Jonas Urbig, portierin e Koln. Bayern ka gjetur gjuhën e përbashkët me 21-vjeçarin, ndërsa tani ka mbetur të arrihet akordi me klubin e Koln.
Bayern kërkon të mbyllë marrëveshjen brenda merkatos së janarit, duke ditur që portieri i tyre i dytë Daniel Peretz ka probleme shëndetësore dhe do mungojë për një kohë të gjatë.
Kontrata e Urbig me Koln skadon në verën e vitit 2026, por dy klubet pritet të bien dakord për shifrën e 8 milionë euro për të mbyllur transferimin e 21-vjeçarit dhe për të qenë direkt nën urdhrat e Kompany. Te Bayern janë të bindur që Urbig, i cili mbron dhe portën e Gjermanisë U-21, do të jetë pasuesi ideal i Manuel Neuer.
